Accessibility links

Кайнар хәбәр

Ämir İslamov: çit töbäklärdäge millättäşlärgä bez küñel açu programmaların ğına täqdim itäbez


Şuşı arada Tatarstanda eşläp kilüçe tatar telle radiolarda üzgäreşlär bula başladı. İnde xäbär itüebezçä, 21 avgusttan başlap ike teldä eşläp kilüçe Yaña ğasır tatar telendä genä söyli başladı. Tatarstanda tağın ber cämäğätçelek arasında tanılğan radio bar – ul Tatar radiosı dip atala. Düşämbedä Tatar radiosı üzeneñ 5 yıllığı uñayınnan turıdan – turı efir aşa jurnalistlar, tıñlawçılar belän fiker alışıp aralaştı. Monnan näq biş yıl elek Qazan häm tirä – yaq Tatarstan rayonnarında FM dulqınnarında berençelärdän bulıp Tatar radiosı tatar telendä efirğa çığa. Alay ğına da tügel äle, radio şähär häm respublikanıñ milli – mädäni tormışında daimi qatnaşıp tora. Äytik, törle konsert – tamaşalar, kiçälär häm şul uq härkemgä tanış bulğan xalıqara Tatar cırı festivale dä Tatar radiosı yärdäme belän ütkärelä. 5 yıl eçendä radionıñ formatı daimi qala, ä andağı tapşırular çeltäre yıl sayın sentäber başınnan üzgärä. Yaña sezonda yaña programmalar, tapşırular efirğa çığa başlıy.

Tatar radiosınıñ 5 yıllıq tarixı, alğa taba plannarı nindi, kiläçäktä tıñlawçılarnı ni kötä? Şuşı xaqta bez tatar radiosınıñ baş möxärrire Ämir İslamov belän söyläştek. Xäzer anıñ belän äñgämäne sezgä dä täqdim itäbez.

- Mäğlüm buluınça, bıyıl Tatar radiosına 5 yäş tula häm 5 yıl eçendä uzğan waqiğalarğa äylänep qararğa forsat tua. 2002 yılğa qädär, yäğni efirğa çıqqannan soñ ber yıl eçendä, bez üzebezgä bilgelängän format buyınça üseş tendensiälären bilgelädek. 2003 yılda bez on-layn rejimda www.tatarradiosi.ru säxifäsendä işetelä başladıq. Häm şul könnän başlap bez täwlek däwamında dönyanıñ här poçmağında işeteläbez, bezne barlıq millättäşlärebez dä tıñlıy ala İnternet çeltäre aşa. 5 yıl eçendä Tatar radiosı şaqtıy populyar häm üz yünäleşendä berdän – ber. Ber yäşlek tuğan könebezne bez 2002 yılnıñ 26 avgustında Kamal teatrı qarşındağı mäydanda ütkärgän bulsaq, bıyıl da bez 30 avgust könne älege mäydanda 5 yäşlegebezne ütkäräçäkbez. 5 säğät däwamında 30 dan artıq cırçıbız çığış yasayaçaq.

Här sentäber başında bezneñ efirda yaña sezon açıla. Yäğni bu yaña tapşırular, programmalar digän süz.

Yaña sezonda çit töbäklärdä yäşäwçe tatarlar öçen tapşırular bulaçaqmı?

Çit töbäklärdäge tapşırular digändä, älbättä bez FM radiosı bularaq häm şul uq waqıtta İnternet aşa böten dönyağa awaz saluçı radio bularaq, inde bez äytergä tieşbez menä, çit töbäklärdäge tatarlar öçen şundıy- şundıy tapşırular alıp barabız dip. Läkin qızğanıçqa qarşı, läkin bu yünäleştä bez maqsatçan eş alıp barmıybız. Läkin bezdä bulğan tapşırularnı alarğa da tıñlarğa qızıqlı bularlıq itep yasarğa tırışabız. Çönki dönyada sibelep yäşäwçe tatarlar belän bezneñ turıdan- turı elemtä yuq. Alardan bezgä şaltıratular bik siräk. İnde bezneñ küñel – açu, muzıkal' format bulğaç, bez çit töbäklärdä yäşäwçe millättäşlärebez öçen barı tik şuşı formatta ğına cälep itä alabız

Tatar radiosında çit töbäklärdä sibelep yäşäwçe tatarlar öçen maxsus radiotapşırular bulmasa da, efir ğayät qızıqlı, bay eçtälekle bulaçaq dip ışandırdı bezne Ämir İslamov.

Gölnaz Şäyxetdin

XS
SM
MD
LG