Awıl xucalığında qızu eş barğanda, küp kenä cirlärdä inde 30 avgust – Respublika könenä äzerlek tä başlanıp kitte. Äzerlek eşläre bigräk tä Qazanda kiñ alıp barıla inde, älbättä. Bäyräm könne qayda nindi küñel açu çaraları, törle tamaşalar programması inde äzer. Şähär xalqın anıñ belän törle mäğlümat çaralarında tanıştıra da başladılar. Respublika köne aldınnan şähärne maturlatu, çistartu da alıp barıla. Bu eşkä qazanlılarnıñ üzlären dä cälep itärgä buldılar citäkçelär. Şuşı uñaydan 23 avgust, çärşämbe könne çistalıq ömäse iğlan itelde Qazanda. Ä qazanlılar üzläre bu ömälär turında ni uylıy, alar kiräkme, keşelär şähärne çistartuda qatnaşırğa äzerme?
- Älbättä çığabız, çönki şähär çista bulırğa tieş.
Menä bügen küp kenä keşelär ömägä çıqtı. Qızğanıçqa qarşı, min üzem çığa almadım, çönki eştän cibärmilär. Şunı äytäse kilä, menä bügen ömä oyıştırdılar, läkin menä eş köne bulu säbäple küp keşe ömägä çığa almıy. Ägär dä inde bu könne şähär külämendä yal bulsa, küp keşe çıqqan bulır ide. Eş köne bulğanlıqtan eşläwçelär dä äz dip uylıym min. Elegräk mäktäptä uqığanda min çığa torğan idem, çönki ul mäcbüri ide.
İñ möhime öydä çista bulsın inde.
Min 12 şär säğät eşlim, şuña işetmädem dä.
Ömä bulasın min belmäde, belgän bulsam älbättä qatnaşır idem. Çönki min andıy ömälärgä uñay qarıym. Bigräk tä yäşlärne mondıy eşkä cälep itärgä kiräk. Şähärne çistarmasaq, başqa keşe çistartıp birmi inde.
Närsä soñ ul ömä, nindi mäğnäse bar soñ anıñ?
Zamanında ömälärdä min yış qatnaşa idem, xäzer inde siräk qatnaşabız. Ömälärgä çaqırsalar bez qarşı kilmibez inde ansı.
Atna urtasında şähärne çistartu ömäsendä min qatnaşa almadım, çönki min eştä buldım. Ägär inde ul şimbä, yäkşämbe könne bulsa, min teläp qatnaşır idem. Şähärebezneñ çistalığı öçen min üzem dä köräşäm.
Gölnaz Şäyxetdin
