II Altın mönbär festivale, anıñ programması, qunaqları, jyuri äğzäläre xaqında bik küp törle mäğlümät buldı aña äzerlek çorında. Ber jurnalistlar ber törle söyläde, ikençeläre başqa mäğlümät, yış qına xätta oyıştıruçılar üzläre dä belmägänne yazıp çıqtı. Nihayät, festival’ başlanırğa berniçä kön qalğaç, anda kiläçäk qunaqlar, täqdim itelgän fil’mnar xaqında tögäl mäğlümät bilgele buldı. Äytkänebezçä, bu xalıqara, zur mädäni çara Qazanda 10 sentäberdän 15nä qädär uzaçaq. Respublikanıñ törle ministrlıqları wäkillärennän torğan oyıştıru komitetın tatarstannıñ premyer-ministrı urınbasarı, mädäniät ministrı Zilä Wälieva citäkli. Festival’dä Rusiäneñ törle cirlärennän, monnan tış İran, Äfğanstan, Qazaqstan, Üzbäkstan, Misır, Britaniä, Äzerbäycan, İtaliä, Katar, Törkiä, Hindstan, İrannan qunaqlar bulır dip kötelä. Alarnıñ qayberläre inde 8dä ük kilä başlayaçaq. Festival’gä täqdim itelgän fil’mnarnı tanılğan Rusiä rejisserı Vadim Äbdräşitov citäkçelegendäge jyuri bäyäläyäçäk. Anardan tış jyuri äğzäläre bulıp Äzerbäycan rejisserı Oqtay Mirqasıym, Britaniädän rejisser häm prodyuser Ovidio Salazar, Misırdan kilgän artistka Fäyza Kamal, itel’yan rejisserı häm jurnalistı Buçço Minotti, iranlı Xösäyen Razi, Üzbäkstannan rejisser Färit Däwlätşin, Mäskäwdän kino belgeçe Sergey Lavrent’yev, Tatarstannan Yuriy Mansurov toralar.
Kinofestival’neñ programması belän dä yaqınnanraq tanışıp kitik. Altın Mönbärne açu tantanası Qazannıñ Salix Säydäşev isemendäge Zur konsertlar zalında uzaçaq. Şul uq könne festival’gä täqdim itelgän fil’mnarnı da kürsätä başlayaçaqlar. Alarnı şähärneñ Grand Cinema kinokompleksında qararğa mömkin bulaçaq. Altın mönbärneñ bäygesendä İran, Rusiä, Britaniä, Hindstanda töşerelgän näfis fil’mnar qatnaşaçaq. Barlığı festival’neñ bäygesendä 35 äsär kürsäteläçäk. Alar arasında näfis, dokumental’, animatsiä fil’mnarı bula. Bäygegä täqdim itelgän näfis fil’mnar arasında Bulat Mansurovnıñ Saga Drevnix Bolgar da bar. Äytergä kiräk, älege fil’m şaqtıy ğına aqça cälep itep, bik ozaq waqıt däwamında töşerelgän ide. Şuña da Tatarstanda anı bik qızıqsınıp kötälär. Tağın ber iğtibarnı ayıruça cälep itärlek äsär – Britan rejisserları quyğan Guantanamoğa yul fil’mı. Monnan tış jyuri äğzälärenä Törkiä, Qazaqstan, İran, Hindstan, Misır, Tunis kinematografistları tarafınnan töşerelgän fil’mnarnı bäyälärgä turı kiläçäk. Konkurstan tış isä Altın mönbär qısalarında törle illärdä töşerelgän 27 fil’m kürsätelä. Alarnıñ barısın da festival’gä rejisser häm dramaturg Odel’şa Agişev citäkçelegendäge saylap alu komissiä täqdim itte. Törle fil’mnar qarawdan tış, festival’ qısalarında bilgele rejisserlar, akterlar, avtorlar belän oçraşular da qaralğan.
Altın Mönbärdä Tatarstanda eşlänelgän fil’mnar bulaçaq. Bäygedä Ramil Töxwätullin studiäsendä töşerelgän animatsion fil’m da qatnaşaçaq. Ana bäyräme digän mil’tfil’m tatar telendä yasalğan. Xäyer, qayber belgeçlär fikerençä, respublika kinematografistları tarafınnan eşlänelgän fil’mnarnıñ ciñü mömkinlege ällä ni zur tügel. bälki şuñadadır bezneñ fil’mnar bäygedän tış programmada ğına qatnaşa.
Ä büläklärgä kilsäk, alar kinofestival’lär öçen şaqtıy ğädäti. İñ yaxşı näfis, dokumental’ häm animatsion fil’m, şulay uq iñ äybät rejisser, operator, irlär rolen başqaruçı, xatın-qız rolen uynawçı bilgelänäçäk. Monnan tış, Tatarstan prezidentınıñ maxsus prizı da tapşırılaçaq.
Gölnaz İlgizär
