Accessibility links

Кайнар хәбәр

Muzıkantlar häm mediklar yökle analarğa klassik muzıka konsertları täqdim itä


Qazanda bügenge köndä ike teatr binasınıñ Tinçurin häm Kamal teatrları häm Ğ Tuqay isemendäge tatar filarmoniäse binaların tözekländerü eşläre belän mäşğüllege, tatar sänğäten söyüçe tamaşaçığa berniqädär qıyınlıq tudırsa da , ämma bu teatrlarnıñ häm filarmoniäneñ icat kollektivlarına bu sezonda eşlären cäyelderep cibärergä, bötenläy dä qomaçawlamıy.

Çönki alar eştän tuqtamıy. Mäsälän, Tinçurin teatrı kollektivı Tatarstan buyınça gastrol'lärgä kitärgä cıyınsa, Kamal teatrı artistları gastrol'lgä çit ilgä cıyına.

Şulay uq tatar filarmoniäseneñ berniçä kollektivı da sentäber ayında Kön'yaq Koreyäğä häm Latviä , Pol'şa yaqlarına gastrol'lärgä cıyına.

Şulay uq filarmoniä bıyıl tamaşaçığa yaña proyekt täqdim itä.

Küptän tügel Ğ.Tuqay isemendäge Tatar däwlät filarmoniäse kollektivı yökle analarğa klassik konsertlar täqdim itü proyektı belän Qazan däwlät meditsina universitetınıñ bala tudıru kafedrası bülege belgeçlärenä möräcäğät itte.

Klassik muzıkanıñ keşe häm tereklek orğanizımına uñay yoğıntı yasawı, anıñ keşe sälämätlegenä yaxşı tä'sir itüe, ğalimnär tarafınnan da raslanğan. Meditsina xezmätkärläreneñ bu proyektnı niçek qabul itüe häm berençe konsertnıñ niçek ütüe turında filarmoniäneñ muzıka bülege mödire Aygöl Sofiskaya bolay dide.

“Bu konsertqa kilgän analar bik qänäğät bulıp qaytıp kittelär . Alar balalarınıñ bik tınıç, tibeşmiçä genä qarında yatuın belderdelär. Berençe konsert S. Säydaşev isemendäge Zur konsertlar zalında tatar däwlät simfonik orkestrınıñ Motsart, Bize, Grig äsärlären başqaruı belän başlandı. Ämma bez mondıy formada konsertlarnı başqa Tatarstannıñ başqa şähärlärendä dä uzdıraçaqbız” dide ul.

Bu proyektnıñ maqsatı häm aldağı konsertlarnıñ kiläçäktäge eçtälege turında filarmoniäneñ citäkçese Qädim Nurullin menä närsälär söyläde:

“Bu proyektnıñ iñ zur maqsatı balağa muzıka yoğıntısı belän bäyle.Bala ana qarınında yatqanda uq yözlärçä yıllardan, buınnan - buınğa küçkän matur klassik cırlar işetergä tieş. Älbättä, agressiv muzıka tügel.

Bu proyektnı bez meditsina xezmätkärläre belän bergä uzdırırğa uyladıq. Aldağı köndä bez tatar xalqınıñ klassik äsärlärennän tözelgän konsertlarnı da täqdim itäçäkbez. Bezneñ törle orkestrlarıbız bar. Simfonik orkestrdan başqa , opera - kamera orkestrı, estrada - simfonik orkestrı , däülät xalıq muzıka qoralı orkestrı , däwlätneñ fol'klor ansamble kollektivı häm başqalar. Menä bügendä, möselman kinosı “Altın mönbär” festivalen yomğaqlawda “Piramida” mädäni küñel açu üzägendä Aydar Fäyzraxmanov citäkçelegendäge däwlät fol'klor ansamble çığış yasayaçaq.” dide ul .

Bügenge köndä äle filarmoniä orkestrları Motsart, Grig, Bize muzıkasın täqdim itsälär, alğa taba mondıy konsertlarda tatar klassik muzıkası äsärlären täqdim itäçäklären belderde Qädim Nurullin.

Mälikä Basıyr

XS
SM
MD
LG