Mädäniät dönyasında, sezon açılu ğädättä, oktäber ayınnan başlana . Bıyıl tatar tamaşaçısı öçen teatr binaları yabıq bulsa da , yäş tamaşaçılar teatrı , häm konsert zalları sentäberdän ük tamaşaçını üzeneñ konsert zallarına çaqıra başladı. Menä pänceşämbe könne genä dä ike tatar tamaşaçı zalı şığrım tulı ide. Alay ğına da tügel, tatar teatrları Qazanda ğına tügel, xätta Rusiäneñ başqa şähärlärendä dä uñışqa qazanıp qaytalar . Mäsälän, Ufada.
Bu könnärdä Ufada IV törki telle teatrlarnıñ xalıqara “Tuğanlıq” festivale tämamlandı. Festival'dä, Tatarstan isemennän Ğ. Kamal tatar akademiä teatrı kollektivı çığış yasadı. Alar A. Çexov äsäre buyınça “Öç señel” spektaklen kürsättelär. Teatr kollektivı festival'neñ “milli säxnädä rus klassikasın gäwdäländergäne öçen ” nominatsiäsendä ciñü yauladı. “İñ yaxşı xatın –qız” rolendä ciñüçe bulıp Tatarstannıñ atqazanğan artistkası Lyutsiä Xämitova tanıldı.
Ä Tatar yäş tamaşaçılar teatrı kollektivı üzeneñ sezonın pänceşämbe könne “Peçän bazarı” spektakle belän başlap cibärde. Anıñ premyerası bıltır bulğan ide. Älege äsär belän yäş tamaşaçılar teatrı “ Art-Ordo” dip isemlängän II xalıqara teatr festivalendä ciñü yaulap ta qayttılar. Älege teatr bıyıl tağın küp kenä yaña premyeralar belän söyenderergä cıyına.
Alarnıñ berse “Amazonka häm Aydar” dip atalğanı , yäş rejisser İlgiz Zäyni tarafınnan äzerlängän. Bu spektakl' sentäberneñ 25 quyılaçaq. Bu spektakl' xatın-qız häm cämğiät turında. Älege xaqta teatrnıñ baş rejisserı Rinat Äyupov bolay dide:
“ Bu yäşlär häm mäxäbbät turındağı äsär. Anda yäşlär arasına eşmäkärlek , biznes kilep kerä. Ämma nindi genä zaman bulsa da, ir-atlar xatın-qızlarsız häm mäxäbbätsez yäşi almıy. Menä şunıñ turında bu äsär ” dide ul.
Teatr, yäşlärneke dip sanalsa da , andağı artistlar arasında bıyıl üzeneñ 60 yäşlek yubileyın bilgeläp ütärgä cıyınğan , Tatarstannıñ xalıq artistı Nuriäxmät Safin tudırğan rol'lär dä bik küp. Bıyıl anıñ öçen maxsus “Korol' Lir ”äsäre” quyılaçaq. Töp geroynı Nuriäxmät Safin üze uynayaçaq.
Ä bu könnärdäge başqa tamaşalarğa kilgändä, pänceşämbe könne Qazannıñ Yäşlär üzägendä “Cide yoldız” konsertı uzdı. Şul xaqta konsertnıñ prodyuserı Lyubidä xanım Yusupova “Azatlıq” radiosına menä närsälär söyläde:
“ Minem uylawımça , bu konsertnıñ yañalığı, bügenge yäşlärneñ borınğı köylärne yañaça başqaruında. Anda 500 urınlı zal şığrım tulı ide. Konsertta cırçılar: Zäynäp Färxetdinova, Zöfär Bilalov, Aydar Ğalimov, İnsaf, Liliä Mullağilieva, Liliä Xämitova qatnaştılar.. Bigräk tä Zäynäp Färxetdinova belän Aydar Ğalimovnı xalıq bik yaratıp qabul itte.“Mubay”, “Barbekyu” törkemnäre häm İlsöya Badretdinova da “Cide yoldız” konsertında berençe tapqır qatnaştı. Alarnı da tamaşaçı bik yaratıp qabul itte. Ä Qazannıñ SKJ - yäğni “Üzäk klub tormışı” dip atalğan ber tönge klubında, pänceşämbedä zur tatarça çara uzdı. “Bars- Media” üzeneñ “Muzıkal' bomba” dip atalğan festivalen uzdırdı. Konsertnı oyıştıruçılar, çarada 1300 keşe qatnaşqan, dilär. Anda cırçılardan Mälikä , Bulat Jihanşin, Puma, Färit Taişev, İlnar Safiullin, Salawat Miñnexanov, Landış Niğmätcanova çığış yasağan. Ä bu konsertta ör-yaña programma belän “Plagiat Klab” - Kamedi klab –tatarça” dip atalğan Çallı törkeme bulğan. Mondıy küreneşneñ äle tatar estradasında bulğanı yuq ide. Tamaşaçı Çallı qunaqlarınıñ cırçılar turında törle parodiälären , yäşlär, mäxäbbät turında törle şayartuların bik yaratıp qabul itkännär.
Mälikä Basıyr
