Televideniedä dä yaña yıl mäktäptäge kebek közdän başlana. Sentäbergä kerü belän ber-ber artlı kanallar yaña sezonnarın açıp cibärep, tamaşaçığa üzgärtelgän bizäleş, yaña isemnär, programmalar, tapşırular täqdim itälär. Üzäk telekanallarınıñ yaña sezon başlawı, alardağı üzgäreşlär xaqında süzlär tınıp barğanda, Yaña ğasır telekompaniäse dä yaña efir yılın başlap cibärde. Kompaniä wäkilläreneñ süzlärenä qarağanda, yaña, 5 telesezon tamaşaçılarğa şaqtıy üzgäreşlär alıp kiläçäk. Alarnıñ berniçä inde täqdim itelde dä. 2 oktäber irtäsennän efirğa Xäyer irtä, Tatarstan programması çıqtı. Üz irtälären Yaña ğasır belän başlap cibärergä öyrängän tamaşaçılar öçen xäzer ike säğät däwamında tatar telendä qızıqlı aralaşu, oçraşular, törle mäğlümät täqdim itelä. Ä menä iñ ähämiätle üzgäreş turında süz alıp barsañ, Yaña ğasırnıñ kübräk tatarça kürsätä başlawın äytep kitärgä kiräkter. Bu respublikada yäşäwçelär öçen genä tügel, çit töbäklärdäge tatar möxitendä yäşärgä teläwçe millättäşlärebezgä dä bik quanıçlı üzgäreş.
Tağın närsälär kötä soñ kanal tamaşaçıların yaña telesezonda? Bu teleradiokompaniäneñ räis urınbasarı Miläwşä Aytuğanovadan soraştıq.
Yaña sezonda tamaşaçılarnı kiçke waqıtta tatar telenä tärcemä itelgän dokumental’ fil’mnar, seriallar täqdim itäçäkbez. Üzebez dä ber serialnı töşerü östendä eşlibez. Bez anı yaña yılğa taba kürsäterbez dip torabız. Monnan tış, balalar öçen tatar telendä mul’tfil’mnar, Tamçı digän tapşırunı üzgärtelgän, bayıtılğan räweştä täqdim itäçäkbez. Qara qarşı dip isemlängän aktual’ temalarğa fikerläşü formasında ber tapşıru efirğa äzerlänä. Anı Tufan Miñnullin alıp baraçaqMenä şundıy yañalıqlar kötä Yaña ğasır tamaşaçıların yaña telesezonda.
Gölnaz İlgizär
