Accessibility links

Кайнар хәбәр

Tatarstannıñ eçke eşlär ministrlığı betä?!


Qazannıñ eçke eşlär işaräsenä yaña citäkçe bilgelände. Düşämbe kiñäşmäsendä başqalanıñ merı İlsur Metşin üze qırıyında eşläwçelärne şähärneñ eçke eşlär idäräseneñ yaña başlığı - Aleksey Selivanov belän tanıştırdı. Selivanovqa qädär bu wazıyfanı Fayaz Şabaev başqarğan bulğan. Xäzer ul Yıraq Könçığış federal' okrugı buyınça iqtisadıy iminlek baş idäräse citäkçese urınbasarı, operativ tabu byurosı başlığı bulıp eşli ikän. Qazannıñ eçke eşlär idäräsenä yaña quyılğan Aleksey Selivanov moña qadär Tatarstannıñ eçke eşlär ministrlığınıñ salım cinayätläre idäräse başlığı bulğan. Eçke eşlär ministrlığı digännän, 29 sentäber sanında “Veçernyaya Qazan” gazetası: “Tatarstannıñ eçke eşlär ministrlığı yäşäwdän tuqtadı” – dip yazdı. Gazeta bu xäbärne Putinnıñ , “Rusiä federatsiäsendäge eçke eşlär ministrlıyklarınıñ”- dielgän qanunına bäyläp bastıra. Bu qanun buyınça eçke eşlär ministrlığınıñ wazifaları, ministr, ministr urınbasarı, fälännäre üzgärä ikän. Xäzer Tatarstan respublikasınıñ eçke eşlär ministrlığı dip yörtelsä, kiläçäktä Başqortstan,Tatarstan häm başqa töbäklär buyınça Rusiäneñ eçke eşlär ministrlığı dip kenä yörteläçäk dielä şuşı uq gazetada. “Veçernyaya Qazan”: “Qarar çıqtı, üz köçenä kerä başladı, Tatarstanda äle eçke eşlär ministrlıygında elekkege wazifalarnı kümmägännär”- dip tä cibärä. Şul uq yazmada respublikanıñ eçke eşlär ministrlığınıñ kadrlar mä’säläsen xäl itüçe başlıqnıñ urınbasarınnan Putinnıñ qararına añlatma birep kitüne häm Tatarstandağı xällär belän dä tanıştırunı da sorağannar. Ul tögäl genä berni äytmi, niçek eşläsäk xäzer dä şulay eşlibez digän. Bez dä eçke eşlär idäräsenä şaltırattıq; ““Veçernyaya Qazan” şulay dip yazğan, döresme ul?”- didek. Tatarstannıñ eçke eşlär ministrlığınıñ jurnalistlar belän eşli torğan bülegennän bezgä başta bolay dip cawap birdelär: - Yuq, bu döres yazılğan xäbär tügel. Bu xäl tiz genä bulmas äle!.. Annan; “Soraşıp qarağız äle üzegeznekelärdän bälki sez genä işetep betermägänsez?” - digäç, Tatarstannıñ eçke eşlär idäräsennän cawap bolay yañğıradı: - Bez älegä berni belmibez. Mäskäwdän käğäzlär kilep citmäde. İkençe atnağa bälki kilep citärlär. Şuña kürä xäzergä berni äytä almıybız, äytmäskä dä quştılar. Käğäzlär kilügä, yañalıq buluğa şunduq xäbär itärbez. Respublikadağı bäysez çığanaqlar, Putinnıñ Rusiädäge eçke eşlär ministrlıykların Mäskäwgä yaraqlı itep tärtipkä salu qararı üz köçenä kerä. Tatarstannıñ eçke eşlär ministrlığı da kiläçäktä Rusiäneñ Tatarstan buyınça eçke eşlär ministrlığı dip yörteläçäk dilär. Röstäm İsxaqi
XS
SM
MD
LG