Uqıtuçılar könenä bağışlanğan respublika bäyräme yıldağıça uzdı- tantanalı räweştä. Ul 3 säğät däwam itte. Härwaqıttağıça iñ aktiv dip sanalğan mäğärif xezmätkärläre respublikanıñ törle rayonnarınnan cıyılğan ide. Barı yañalıq şunda şularnıñ 300гә yaqını bıyıl Rusiä Prezidentınıñ grantı bularaq 100 meñ sum aqça aluçılar. Dimäk küpçelekne alar täşkil itte. Mäsälän Aznaqaydan grantqa layıq buluçı 6 keşe çaqırılğan ide.
Aznaqay rayonı mäğärif idäräse citäkçese Damir Ğıyläcev
Aznaqayda 3554 uqıtuçı bar. Barlığı 10 delegat alıp kildek. 6сы grantqa layık buluçılar. Şulay uq mäktäp direktorı bar.
Mäğärif xezmätkärlären hönäri bäyrämnäre belän qotlarğa kilgän Tatarstan Däwlät Şurası räise Färit Möxämmätşin uqıtuçılarnı älläni söyendermäde dä, köendermäde dä – aqça mäs’äläsendä. Färit Möxämmätşin
Kiläse yılğa mäğärifkä respublika qaznasınnan 4 milliard sumğa yaqın aqça qaraw küzdä totıla. Byudjet kierenke. Mäskäwdän aqça kiterä torğan maqsatçan programma tögällände. Neft'neñ dä bäyäsen belep bulmıy. Ul törleçä tibrälä.Qızğanıçqa kübräk töşü yağına.
Färit Möxämmätşin eş xaqları artaçaq dip söyendermäsä dä, eşkä tuqtaldı. Mäğärif ölkäsendäge reformalar, yäğni üzgärtülär turında şaqtıy äytte. Ğömer buyı cıyılğan täcribäne beterü kiräkmi, anı yañartu zarur dide. Üzgärtülärneñ näticäsendä optimizasiä, mäktäplärne berläşterü barlıqqa kilde. Uqıtuçılar eşsez qaldı. Färit Möxämmätşin optimizasiä bulsa da ul sıyfatnı yaxşırtırğa tieşlegen belderde. Kiläçäktä respublika däräcäse neft'kä qarap tügel, ä bezneñ xalıqnıñ beleme nigezendä bäyälänäçägen assızıqladı Färit Möxämmätşin. Äye, xäzer uqıtunıñ törle ısulları barlıqqa kilde. Mäsälän Tuqay rayonı Bätke awılında rus balalarına tatar telen uqıtuçı Gölsinä Yaqupova
Tatar telen uqıtqanda qayber balalar yatlap kilälär. Şuña balalarnı kommunikativ räweştä uqıtabız. Testlar biräbez. Här sorawnı här balağa birep cawap alırğa tırışabız.
Añlaşıla ki, 3-4 meñ xezmät xaqı alğan uqıtuçı isä köne-töne mäktäptä utırğançı, öyenä qaytıp terlek asrawnı qulayraq kürä. Yarıy äle uqıtuçılar könendä genä bulsa da mäğärif xezmätkärlärenä büläklär birelä. Pänceşämbe könne dä alarnı Färit Möxämmätşin da, respublikanıñ mäğärif häm fän ministrı Räis Şäyxelislamov ta tapşırdı. Boları yıl da bula torğan ğämällär. Büläkläwneñ isä tağın ber yaña ısulı barlıqqa kilgän. Xäzer respublikanıñ şirqat citäkçeläre dä uqıtuçıların säxnädän qotlap büläk tapşıra başladı. Pänceşämbe könne Yäşel Üzänneñ suıtqıçlar çığaruçı “Pozis” oyışması citäkçese Radik Xäsänov Bua rayonı Tinçäle awılında üzenä belem birgän Mönirä Fäezovağa räxmät süzläre äytep suıtqıç büläk itte. Taw belän taw ğına oçraşmıy, keşe belän keşe oçraşa digändäy, zamanalar şuña kitte. Bügen ikele quyğan uquçıñ irtägä kem bulasın belep bulmıy.
Landış Xarrasova
