Accessibility links

Кайнар хәбәр

Qazanda uñış bäyräme


Comğa Tatarstannıñ igençeläre Qazanğa, “Piramida” mädäni-küñel açu binasına uñış bäyrämenä cıyıldılar. Respublika külämendä uzuçı älege çarada, Tatarstan prezidentı, ministrları, şähär merı, rayon başlıqları häm başqa türälär ber-bersen, annan igençelärne awıl xucalığı xezmätkärläre köne belän qotladılar. Başqalanıñ “Piramida”sı tiräsen allı-gölle töslär, yäşelçälär kürgäzmäse çolğap alğan ide. Zur-zur taqtalarda Tatarstannıñ aldınğı rayonnıñ qırlarında, xucalıq binalarında töşerelgän tösle foto surätlär. Bu foto räsemnärgä qarap-qarap kitkän igençe abzıy-apalar soqlanıp ta, borçılıp ta alalar: “Ex böten rayonnarda da şuşı foto surätlärdäge xätle texnika, mul uñışlı qırları bulsa ikän…”- dip quyalar. Mikrofon kürsätügä qaça başlıylar. Bıltır Uñış bäyräme Qazannıñ “Basxet-xol” binasında bulsa, bıyıl Piramidada aldınğı dip tabılğan awıl xucalığı xezmätçännären qimmätle büläklär, maqtaw käğäzläre, traktorlar belän söyenderdelär. Älege çara bulğançı “İntertat.ru” respublikanıñ elektron gazetası: “Başqa yıllar belän çağıştırğanda, bıyıl älege bäyrämgä, rayon yäki oyışma citäkçeläre genä kiläçäk” – dip yazğan ide. Moña ışanırğa da bula çönki uñış bäyrämendägelärneñ kübese igençegä oşamağan ide. Maşinaları inomarkalar. Yarıy monsı başqa närsä, süzebez uñış bäyräme turında ide bit äle. 2006 yılda Tatarstan igençeläre 4mln. 600 meñ tonna aşlıq cıyğannar. Respublikanıñ awıl xucalığı ministrlığı wäkile Almaz Kaşapov söyli: - Uñış bıyıl ciñel genä cıyılmadı. Bez uñış belän qänäğät, yıl sayın xäyran ğına aşlıq cıyıp alabız. Menä monda Tatarstannıñ iñ aldınğı 7 rayonı bilgelände: Baltaç, Aqtanış, Nurlat, Bua, Çirmeşän, Zäy, Apas. Bäyrämgä respublikanıñ şuşı häm başqa rayonnarınıñ igençeläre, terlekçeläre, xucalıq, oyışma citäkçeläre kildelär. Tatarstan prezidentıynnanhäm başqa citäkçelärennän qimmätle büläklär alıp, maqtaw süzläre işetep qaytıp kittelär. Aldınğı rayonnardan Zäy, Apas digännän. Zäylelär qullarına premiä, maqtaw käğäzläre, ör-yaña traktornıñ käğäzlären alğaç “Azatlıq”qa söyläwne kiräk dip tapmadılar. “Yuq, yuq söyli almıybız!” - dip kitep bardılar. Ä Apaslılar söyläde. Alarnıñ bıyıl kürsätkeçläre başqa yıllardan küpkä yuğarı bulğan. Apas rayonı Yaña Yul xucalığı citäkçese Mansur abzıy Gäläwetdinov belän aralaşabız: - Bıyılğı bäyräm dä yıldağıça bik yaxşı oyıştırılğan. 1997 yıldan birle uñış bäyrämenä kiläm. Awıl xucalı ölkäsendä 1968 yıldan birle. Bez bıyıl rayon tarixında berençe tapqır mul uñış aldıq. Gektarınnan 32 sentner. Bäyrämgä rayonğa 8 keşe kildek. Ulım da kilde, ul kombayner bulıp eşli. Sez Apaslı Mansur abzıy Gäläwetdinovnı tıñladığız. Uñış bäyräme yıldağıça uzdı. Tatarstan citäkçelege aldınğılarnı qotladılar, büläklär tapşırdılar, artta qalğan rayonnarnı süz belän ruxlandırdılar. Röstäm İsxaqi
XS
SM
MD
LG