Oktäber ayı tatarlarnıñ küñel tarixında ul Xäterne yañartu ayı bulıp xalıqnıñ küñelendä uyılıp qalğan. Çönki oktäber ayında bezneñ millättäşlärebez üzeneñ küpme ğasırlar buyı zur däwlät bulıp yäşägän Qazan xanlığın yuğaltqan. Bıyıl däwlätebezne yuğaltqanğa 454 yıl tula.
Häm şuşı däwlätne, watannı saqlap, bezneñ imanlı bulıp qaluıbız öçen şähit kitkän babalarıbız ruxına yıl sayın törle çaralar ütkärelä. Qazan şähärendä yıl sayın ütkärelgän İrek mäydanındağı mitingta, oyışqan räweştä xätta törle şähärlärdän häm başqa respublikalardan da tatarlar qatnaşa.
Här yıl sayın babalarıbız ruxına doğalar uqıla, mitinglar oyıştırıla, şağirlär , yazuçılar tarafınnan sallı- sallı, köçle fikerlär yañğırıy.
Cämğiätne üzgärtep qoru yılları başlanğannan birle, “Xäter köne” bik küp millättäşlär küñelenä 15 oktäber köne bulıp kerep qalğan.
Menä inde berniçä yıl däwamında ğalimnär fänni nigezdä isbatlağança, “Xäter köne” dip 12 oktäberne Watan saqçıların iskä alu köne dip bilgeläp ütälär. Häm bertörlem millättäşlär şulay uq bu könne Söyembikä manarası yanına barıp anda doğa qılalar.
Xäter könen ütkärü bıyıl närsäse belän ayırılıp tora soñ?
Moñarçı bu çaralarnı ütkärüdä kübesençä ölkän yäştägelär qatnaşıp kildelär. Ä bıyıl ÜZEBEZ yäş buın yäşlär xäräkäte 15октябрь könne Xäter könen ütkärüdä oyıştıruçılar rätendä qatnaşırğa teläk beldergän. Bıyıl yäşlär İrek mäydanında üzläreneñ köçle milli xislären, yalqınlı sotsial' yañğıraşlı cırların da yañğırataçaqlar ikän.
ÜZEBEZ xäräkäteneñ oyıştıruçılarınıñ berse ğalimä Rezida Safiullina bu xäräkätneñ nindi maqsat belän oyıştıruçılar räweşendä qatnaşırğa teläk belderüläre turında “Azatlıq” radiosına fikerläre belän urtaqlaştı:
İñ berençe çiratta bez bu çarağa kübräk yäşlärne qatnaştırırğa telibez. Milli ğorurlığıbıznı nığıtu, imannı yañartu, täwbä itü häm tatarlıqnıñ isän ikänen kürsätü dä. Ä bu iñ berençe çiratta bezdän yäşlärdän tora.
“ Qazannı, Watannı saqlap şähit kitüçe millättäşlärebez ruxına: Qol Şärif, Söyembikä, Batırşa , Ğaspralı , Ğayaz İsxaqi, Marat Mulyukov , Wafirä Ğizzatullinalar ruxına doğa qılaçaqbız. Bez alarnı onıtırğa tieş tügelbez.Alar härçaq bezneñ belän, bezne ilhamlandırıp toruçılar , härçaq bezgä köç östäp toralar. Bez alarnıñ eşlären däwam itterergä uylıybız. Bıyıl İrek mäydanında yäşlärdän çığış yasawçılar: İlsöyä Bädretdinova , İttifaq firqäse yegetläre, İsmail rok törkeme dä bulaçaq. ”
“ Bu mitingta yäşlär tarafınnan äyteläçäk töp fiker “Bez isän”digän şiğar astında uzaçaq. Bu süzlär Aydar Xälimneñ şiğerennän alınğan.. Xäzer Aydar Xälimneñ şiğerennän Rezida Safiullina özek uqıp kitäçäk.
Taşlar bastı bezne,
Taşlar bastı
.Biş ğasır
Taşlardan izelsäñ;
Äytü läzzät ikän
Çäçräp çığıp,
Äytü läzzät ikän
Bez isän!
Tatar xalqınıñ yazmışı bügenge köndä yäşlär qulında, ämma
buınnar çılbırı özelmäsen öçen yäşlär belän bergä telne, dinne , ilne saqlaw här tatarnıñ burıçı.
Mälikä Basıyr
