Başqortstan Prezidentı Mortaza Räximovnıñ yaña möddätkä Prezident itep bilgelänüe iğtibar üzägendä qala. Xäbär itüebezçä, 10 üktäber respublikanıñ däwlät cıyılışı anı wazifasında qaldırdı. Tawış birüdä 120 deputatnıñ 119 qatnaştı häm barısı da uñay tawış birde. Çarada qatnaşqan İdel buyı federal' okrugı başı Aleksandr Konovalov Mortaza Räximovqa Rusiä gerbı, Rusiä tarixı kitabı häm şaxmat büläk itte.
İnnauguratsiädän soñ Räximov jurnalistlarğa kiläçäkkä plannarı belän büleşep, respublika xökümäten tulısınça otstavkağa cibärerlek, läkin barısın da bulmasa da, kadrlar üzgäreşen kötegez dip belderde.
Oppozitsiä şul uq könne parlament binası qarşında Mortaza Räximovnıñ bilgelänüenä qarşı piket uzdırırğa cıyınsa da, ul ütmäde. Oppozitsiä citäkçelege Rusiä Prezidentınıñ Mortaza Räximovnı yaña möddätkä kürsätüe belän kileşüen belderde. Şul uq waqıtta “Yaña Räximov iskesennän ayırıla. Monısın Putin teläsä qayçan urınınnan alala ” dip belderde.
İnternetnıñ “Başnyus” mäğlümat agentlığı Räximov innauguratsiäse bulğan könneñ “Novaya gazeta” jurnalistı Anna Politkovskaya cirlängän köngä turı kilüennän simvolik mäğnä kürä.
İnde Mortaza Räximovqa qotlawlar da ağıla başlağan. Berençelärdän bulıp Tatarstan Prezidentı Mintimer Şäymiev qotlağan.
Mönir Wafin, Ufa
