Accessibility links

Кайнар хәбәр

Qırğızstanda yaña konstitutsiä bulaçaq. Prezident wäkälätläre parlamentqa küçä


Uzğan töndä oppozitsiä wäkilläre xökümät taraflı deputatlar belän yaña konstitutsiä ölgese mäsäläsendä kileşügä ireşte. Prezidentnıñ xakimiäten çiklägän häm kübräk wäkälätle, zurraq parlament tözüne küz aldında totqan bu ölgene xäzer deputatlar tikşerergä tieş. Şuşı dokument ay buyı barğan säyäsi köräşkä noqta quyarğa mömkin.

Qırğızstannan kilgän xäbärlärgä qarağanda, konstitutsiäneñ şuşı yaña ölgese qabul itelsä, prezidentnıñ qayber wäqälätläre parlamentqa küçä, häm Qırğızstan prezident respublikasınnan parlament-prezident respublikasına äylänä.

Yaña dokumentqa kürä, xökümätne parlamentta küpçelekne täşkil itkän partiä töziäçäk, prezident anı raslıy. Prezident İminlek xezmäte häm baş prokuratura östennän dä kontrolen yuğalta. Ul şulay uq Üzäk saylaw komissiäse häm Xisap pulatı räislären urınınnan ala almayaçaq.

Alay da, Qormanbäk Baqıev cirle xäkimnärne bilgeläw wäkäläten üzenä qaldırırğa sorağan. Monnan tış ul konstitutsiä avtorlarınıñ berse bulırğa teläk beldergän.

Baqıev tarafdarları, şuşı kileşülär Bişkäkneñ Alatoo mäydanında berniçä kön barğan protest çaralarına noqta quyar dip ömetlänä. Oppozitsiä wäkilläre anda uzğan atnakiçtän birle, prezidenttan reformalar başqarırğa yä isä anı urınınnan kitergä taläp itte.

Berniçä meñ protest belderüçe mäydanda çärşämbedä dä bar ide. Oppozitsiädäge deputat Timer Sariev radiobıznıñ qırğız bülegenä bolay dide:

"Ägär bez yaña konstitutsiäne qabul itmiçä, xalıqnı taratsaq, awır xäldä qalaçaqbız. Prezident monı añlarğa tieş. Bu däwlätebez tarixında hälitkeç mizgel. Baqıevqa bezneñ berdän-ber taläp – reformalar başqaru. Ul cawaplı säyäsätçe bulırğa, monı eşlärgä tieş" di oppozitsiädäge deputat Timer Sariev.

Uzğan töndä Alatoo mäydanında xökümät taraflı köçlär belän oppozitsiä arasında çualışlar buldı. Berniçä keşe yaralanğan dip xäbär itelä. Oppozitsiädäge deputat Melis Eşimxanov monıñ qabatlanu ixtimalınnan qurqa:

"Xäzer watandaşlar konfliktı başlanu qurqınıçı bar. Yaña çualışlar başlansa, xökümät tä, oppozitsiädä kontrolne yuğaltırğa mömkin. Küz uñında bezneñ yä prezident Baqıevnıñ ambitsiäläre tügel, ä keşelärneñ tormışı, iminlek bulırğa tieş" di oppozitsiädäge deputat Melis Eşimxanov.

Ul arada çärşämbedä Qırğızstannıñ berniçä töbägendä prezident taraflı demonstartsiälär ütkän. Şul isäptän, Baqıevnıñ tuğan yağı könyaqtağı Calalabad, kürşe Oş, tönyaqtağı Talas töbäklärendä häm dä başqala Bişkäktä.

Könyaqtağı Batken töbägendä ütkän şundıy ber çarada demonstantlar parlamentnı taratırğa taläp itep imza cıya başlağan.

Çärşämbe töştän soñ Qırğızstannıñ däwlät sekretare Adaxan Madumarov yaqın arada prezident konstitutsiä ölgesen parlamentqa tapşırırğa cıyına dide.

Ali Ğilmi
XS
SM
MD
LG