Accessibility links

Кайнар хәбәр

Yewropa Berlege Belarusqa yaña täqdim yasadı


Yewropa Berlege bügen tağın ber märtäbä Belarusnı Berlekneñ Kürşelek Programmasına quşılırğa çaqırdı. Tışqı mönäsäbätlär komissionerı Benita Werrero-Waldner Belarus xökümätenä sişämbe irtän Yewropa täqdimeneñ bulaçaq faydaları turında xat tapşırıldı dide. Ämma ul bu täqdimnär barı Belarusta demokratik reformalar üktärü şartı belän bergä quyıla dide.

Yewropa Berlege älbättä bu täqdim belän Belarus prezidentı Aleksandr Lukaşenko ciñel genä aftoritar säyätennän baş tartır dip uylamıy.

Ferrero Waldner Yewropa Berlege bu täqdim belän Belarus xalqına möräcäğät itä dide.

"Bügen bez Belarus xalqına möräcäğät yullıybız. Bu möhim närsä. Bez Belarus xalqına ildäge şartlar üzgärgän oçraqta Belarusqa närsä täqdim itä aluıbıznı añlatıp möräcäğät itäbez" dide.

Xökümättän qala bu möräcäğät xökümättän tış oyışmalarğa häm zur kiñküläm mäğlümät çaralarına da taratıla.

Anda qısqaça ğına Yewropa Kürşelek Programmasına quşılunıñ faydalı yaqları telgä alına. Alar arasında tärräqiät yardäme, Berlek illärenä viza alunı ciñeläytü, oyıştıru-tözü yardäme häm başqalar bar. Moldova belän Ukraina bu mömkinleklärdän inde faydalana.

Yewropa Kürşelek Programmasına quşılu öçen Belarusqa berniçä şart quyıla. Alar irekle häm ğädel saylawlar ütkärü, irekle fiker belderü xoquqın, sivil cämğiät xoquqların xörmät itü, säyäsi totqınnarnı irekkä çığaru. Belarus şulay uq bäysez mäxkamälär buldırırğa, milli azçılıqlarnıñ xoquqların häm irekleklären, käsepçelärneñ xoquqların xörmät itärgä, ülem cäzasın beterergä tieş.

Ferrero-Waldner Ukrainanı berniçä märtäbä ürnäk itep kiterde. Şul uq waqıtta Yewropa Berlege Lukaşenko xakimiäten bärep töşerergä öndi digän fiker tudırmasqa tırıştı.

"Bez berqayçan da ber genä partiäne, ber genä xakimiätne yaqlamadıq. Bez ägär dä il xalqı saylarlıq däräcädä ölgerä ikän, ul şiksez Ukrainadağı kebek demokratiäne, qanunlılıqnı häm keşe xoquqların saylıyaçaq" dide Ferrero-Waldner.

Räsmilär äytüençä, Berlekneñ könçığış kürşelärgä 2007-2013 yıllardağı yardäm büdjetı 12 milliard dollarğa citäçäk. Bu plan 29 noyäberdä Brüsseldä iğlan itelergä tieş.

Şulay da Ferroro Waldner ägär dä Belarus Yewropa Berlege taläplären ütäsä ul aqçalarnıñ küpme öleşe Belarusqa bireläçägen äytä almadı.

Naif Aqmal, Praga.
XS
SM
MD
LG