Accessibility links

Кайнар хәбәр

Qazannıñ Aviatözeleş rayonında Yañarış çorı kötelä


Qazannıñ iñ çitendä Karavaevo dip atalğan ber bistä bar. Şulay uq yänäşädä Severnıy häm Jilka digän bistälär dä urnaşqan. Şähär üzäge belän älege bistälär arası, transportta barğanda, cir belän kük arası kebek toyıla. İkençe törle äytkändä, bu - barsañ, tiz genä barıp citep bulmıy, kitäseñ kilsä, tiz arada kitep bulmağan cirlär. Şähärneñ üzäktäge berär uramınnan Karavaevoğa cıyınsañ, säğät-säğättän dä artıq aldan çığarğa kiräk. Tiz yöri torğan marşrutkalarğa utırsañ da şulay äle bu. Salmaq qına yörüçe tramvay-trolleybuslarda baru turında uylarğa da qurqasıñ. Kiçke waqıt turında äytäse dä yuq. Kiçke tuğızdan da qalsañ, qaytam dimä inde sin Karavaevodağı tuğan ızbaña. Qayber avtobuslar soñğı reysların sigezdä ük tuqtata.

Qazannıñ menä şuşındıy yıraq cirläre Aviatözeleş rayonı dip atala. Döres, monda Qazan öçen bik tä möhim bulğan zavodlar urnaşqan. Orgsintez, vertoletlar, motorlar tözü zavodları, mäsälän. Şuña kürä älege rayonda da kübesençä şul zavod eşçeläre yäşi. Şähär industriä mäxälläsen täşkil itä alar.

Tik şul uq eşçelärneñ balaları da bar bilgele. Ä menä şul balalar öçen tözelgän ayırım mädäni-sport üzäkläre dä, keşelär räxätlänep yöri alırlıq säwdä yortları yuq. Döres, keçkenä kibetlärne, bazar häm uram kioskların isäpkä almağanda. Qazannıñ 1000 yıllığı uñayınnan cäyelgän Yañarış dulqını monda, äyterseñ lä, kilep tä citmägän.

Sovet çorında uq älege rayon yıraq industrial zona bulıp isäplängän. Bu elek tä şulay bulğan, xäzer dä şul uq xäl. Qayçan da bulsa ber keşe räxätlänep yäşärlek şartlar bulır mikän monda, dip borçıla biredä yäşäwçelär küptännän.

Ällä inde xalıq teläklären işettelär, ämma 21 noyäber könne Qazan Başqarma komitetı citäkçese Marat Zahidullov Aviatözeleş rayonı başlığı Andrey Belov belän oçraştı. Älege rayonnıñ problemaları häm başqarılırğa tieşle eşlär turında söyläşte alar. Marat Zahidullov süzlärenä qarağanda, Aviatözeleş rayonında küp kenä üzgäreşlär bulırğa tieş. Ä närsä üzgärtergä telilär ikän soñ. Bu xaqta Marat Zahidullov bolay dide.

Bıyıl sotsial ipoteka buyınça 23,5 meñ kvadrat metr toraqnı faydalanuğa tapşıraçaqbız. Küp yıllar buyı biredä bernindi dä tözü eşläre bulmağan, yaña yortlar salınmağan. Ä ikençe yılğa isä, älege rayonda bez 110 meñ kvadrat metr cirdä yortlar salaçaqbız. Şunıñ belän bez keşelärne eş belän dä tä''min itäbez, rayonğa eşkä sälätle keşelärne dä cälep itäbez.

Marat Zahidullov süzlärenä qarağanda, rayon buyınça yörgän waqıtta, biredä sivilizatsiägä turı kilüçe ber genä tuqlanu punktları da, säwdä üzäkläre dä yuq. Şähärneñ üzäk rayonnarında urnaşqan MacDonald''slar, kafelar turında äytäse dä yuq. Ä alar rayonğa çınnan da kiräk.

Plannar qızıqtırğıç, älbättä. Şuşı quyılğan maqsatlar häm uylanılğan plannarnıñ barısı da çınğa aşırmı? – menä närsä qızıqlı. Eşlägän oçraqta da, qayçan bulır ikän? 2 yıldan, 5 yıldan, yäisä 15 yıl kötärgä kiräk bulır mikän? Xäyer, Qazannıñ älege cähännäm poçmağında yäşäwçelärne Sovet çorınnan uq “bulır” digän süzlär belän sıylıylar.

Güzäl Zıyätdinova.

XS
SM
MD
LG