Yekaterinburg şähärendä Tatarstannıñ Uraldağı daimi wäkillege qarşında “Tatar-inform” mäğlümat agentlığınıñ mäğlümat byurosı açıldı. Bu waqiğa uñayınnan Yekaterinburgqa “Tatar-inform” informatsion agetlığınıñ general' direktorı Leonid Tolçinskiy, “Tatmedia” agentlığınıñ general' direktorı urınbasarı Aydar Sälimgäräev kilgän ide. Korpunkt açılu tantanasında Sverdlovski ölkäse gubernatorınıñ mäğlümat departamentı citäkçese Mixail Sveşnikov ta qatnaştı.
Tantananı Tatarstannıñ Uraldağı daimi wäkile Rawil Bikbov açıp cibärde. Ul qısqaça ğına soñğı un yıl eçendä Tatarstan respublikası belän Sverdlovski ölkäse arasındağı mönäsäbätlärneñ üseşenä küzätü yasadı häm ul mönäsäbätlärneñ soñğı yıllarda sıyfat yağınnan bik yuğarı däräcägä kütärelüen bilgeläp uzdı. Rawil Bikbov äytüençä, ike region arasındağı xezmättäşlek bügenge köndä tawar äyläneşe üsüe belän genä isäplänmi. Bu bäyläneşlär inde iqtisadi häm mädäni ölkälärdä genä tügel, fänni häm mäğlümat almaşu sferalarında da çağıla. Şuña kürä Yekaterinburgta Tatarstannıñ mäğlümat byurosı açılu bik waqıtlı häm möhim waqiğa, dip assızıqladı Rawil äfände.
Leonid Tolçinskiy Sverdlovski cirenä kilüe maqsatı turında söylägändä, bulaçaq korpunkt cibärgän mäğlümatlarnı Tatarstandağı barlıq ğammäwi mäğlümat çaraları arqılı taratılaçağın belderde.
Ul üzeneñ çığışında Rossiäneñ başqa töbäkläre häm BDB illäre belän mäğlümat almaşu ürnäkläre turında söyläp uzdı. Anıñ äytüençä, Rossiäneñ iñ quätle regionnarınıñ berse bulıp torğan Sverdlovski ölkäsendä mondıy korpunkt buldıru küptännän zarur ide. Leonid Grigor'yeviç fikerençä, Tatarstan öçen Sverdlovski ölkäsendä uzğan säyäsi häm sotsial'-iqtisadi waqiğalarnı, tatarlar tuplanıp yäşägän töbäkneñ tormışın yaqtırtu, mädäniät, sport ölkälärendäge yañalıqlarğa küzätü yasap toru qızıq bulaçaq. Bu äle berençe adım, yaqın kiläçäktä bez açqan mäğlümat byurosı basma matbuğat öçen genä tügel, televidenie öçen dä mäğlümatlar cibärep toru däräcäsenä citär dip ışanabız, dide Tolçinskiy äfände.
Şul uq fikerne Tatmedia agentlığınıñ general' direktorı urınbasarı Aydar Sälimgäräev tä xupladı. Anıñ söyläwençä, xäzerge waqıtta böten Rossiädä televidenie signalın tapşıru sıyfat yağınnan yuğarıraq däräcädä bulğan “san” texnologiäsenä küçä. “Sverdlovski ölkäsendä bu texnologiä buyınça töbäk konsepsiäse bik köçle, “Tatarstan-Yaña ğasır” televideniesı signalın birüdä bu texnologiäne qullanıp bulmas mikän dip söyläşergä kildek”, - dide ul. Ul şulay uq Ural cirendä TNVnıñ korpunktın buldıru mömkinçeleklären öyränüen äytte.
Aydar Säyetgäräyeviç Tatarstan Yaña ğasır kanalınıñ töbäklärdä korpunktlar açu yulı belän ğomumtatar televideniesenä äverelü yulları, anıñ tatarça eçtälege üzgärü mömkinçelekläre turında da söyläp uzdı.
Tantanağa cıyılğan jurnalistlarnı yaña mäğlümat byurosınıñ matdi nigeze, kadrlar mäs’äläse, mondıy byurolarnıñ başqa wäkilleklär qarşında oyıştırılu oçraqları barmı ikänlege qızıqsındırdı. Barlıq sorawlarğa cawap birgännän soñ, daimi wäkil Rawil Bikbov häm “Tatar-inform” mäğlümat agentlığınıñ general' direktorı Leonid Tolçinskiy Tatarstannıñ Uraldağı daimi wäkillege qarşında “Tatar-inform” agentlığınıñ mäğlümat byurosı açılu turındağı Kileşügä tantanalı räweştä qul quydılar.
Annan soñ üzara aralaşu tügäräk öställär yanında däwam itte.
Fäwiä Safiullina,Yekaterinburg
