Accessibility links

Кайнар хәбәр

"Guantanamoçılarğa" Yuğarı mäxkämä qararı


2005 yılda, Bögelmädä gaz torbasın şartlatuda Rawil Gomärevqa, Fänis Şäyxetdinovqa häm Timur İşmurftovqa qarata Tatarstannıñ yuğarı mäxkämäse tarafınnan, gäyeple dip çığarılğan xökem qararına qarşı birelgän kassatsiä şikäyäten qarawnı Rusiäneñ Yuğarı mäxkämäse ike tapqır kiçektergän ide inde. Çönki, gäyeple dip tabılğannarnıñ advokatları mäxkämä waqıtında qanun bozular bulğan dip, Yuğarı mäxkämägä bu eşne yañadan tikşerüne sorap, üteneç yullağan idelär. Ul waqıtta Rusiäneñ Yuğarı mäxkämäse advokatlarnıñ bu üteneçlären qänäğätländerep, mäxkämäne soñraq waqıtqa bilgeläde. Bügen, yäğni 29 noyäberdä, şuşı eş buyınçı Yuğarı mäxkämädä soñğı utırış buldı. Gäyeplänüçelärdän bu mäxkämä utırışında qatnaşırğa teläp barı tik Rawil Gomärev ğariza birgän. Häm anı şuşı kassatsiä şikäyäten tikşerü waqıtına Mäskäw törmäläreneñ bersenä alıp kilgännär. Şul uq waqıtta Rawil Gomärev mäxkämä zalına kertelmäde, anıñ belän elemtä monitor aşa alıp barıldı. Rawil Gomärev, bez ğäyeple tügel, inde ul torbanı şartlatuçı qulğa alınğan häm törmädä utıra, bezne ğäyeple dip çığarılğan xökem qararın ğamäldän çığarunı sorıybız digän belderüenä, Yuğarı mäxkämä xäkime Cämil Ğaliullin, ul mäxkämä qararın cämäğät mäxkämäse çığarğan, Yuğarı mäxkämäneñ ul qararnı ğamäldän çığarırğa xoquqı yuq, dide. Şunısı da qızıqlı, cämäğät mäxkämäse bu eş buyınça ike tapqır xökem qararı çığarğan. Berençe qarar ğäyeplänüçelärne aqlaw qararı bulsa, ikençe utırış inde гәепләнүчеләргә 11 yıldan 15 yılğa qädär iregennän mäxrüm itep, qatı rejimlı koloniädä utırırğa digän qarar çığarğan. 29 noyäberdä uzğan Yuğarı mäxkämä utırışında däwlät gäyepläwçese kassatsiä şikäyäten urınsız, yäğni advokatlar kitergän dälillär döreslekkä turı kilmi dip belderde. İnde Yuğarı mäxkämäneñ bügenge qararına kilgändä, alar Tatarstan Yuğarı mäxkämäse xökem qararın ğamäldän çığarmasalar da, cinayät kodeksınıñ bu eşlär öçen kürsätelgän matdäse buyınça iñ az birelä torğan möddätne saylağannar. Şulay itep, 11 yılğa iregennän mäxrüm itergä xökem itelgän Timur İşmuratovqa 8 yıl da ber ayğa, 13 yılğa xökem itelgän Rawil Gomärevqa 9 yılğa, 15 yılğa xökem itelgän Fänis Şäyxetdinovqa 10 yıl da 10 ayğa iregennän mäxrüm itärgä digän xökem qararı iğlan itelde. Bu qarar belän kileşmägän advokatlar eşne Yevropanıñ keşe xoquqları mäxkämäsenä birergä cıyınalar. Şäyxetdinov Fänisneñ advokatı Ramil Ğataullin bu eşne başlağan da inde. Anıñ şiqayäte Yevropa mäxkämäsendä terkälü alğan. Bügenge mäxkämädä qatnaşqan Timur İşmoratovnıñ advokatı Färit Baybikev Yuğarı mäxkämä qararın “balıq bulmağanda qısla da balıq” inde dip atadı. Şulay itep, advokatlar gäyepläre bulmasa da gäyeple dip tabılğan öç Tatarstan yegeteneñ advokatları, Yuğarı mäxkämäneñ 29 noyäberdä çığarğan qararı belän tanışqannan soñ eşne qaysı yunäleştä alıp baraçaqların bilgeläyäçäklär. Äle Yevropa mäxkämäsenä qadär Rusiä Yuğarı mäxkämäseneñ küzätüçelek mäxkämäse bar. Anısı inde iñ yuğarı mäxkämä sanala, dide Färit Baybikev. Şul uq waqıta ul, bu gäyeplänüçelär üzlären gäyeple dip tapmıylar. Alar Alla belän ant itälär, läkin bu xökem qararı alarnıñ Afğanıstanda buluları, Ğuantanama törmäsendä utıruları belän bäyle dip qarıylar dide ul. 29 noyäberdä uzğan mäxkämä utırışında İslam komitetı digän oyışmadan da wäkil bar ide. Tat''yana Tarasova islam qabul itep, üzenä Fatima digän isem alğan. Ul törmädä utıruçı Rawil Ğomärevnıñ xälen belep toruların äytte. Ä inde bügenge qarar turında ul: “Bu mäxkämädän başqaça närsä kötärgä mömkin dä tügel ide. İregennän mäxrüm itelgän keşe öçen 13 yılmı, 9 yılmı ayırma küp tügel. Şatlanır urın yuq», dide Rusiäneñ İslam komitetı wäkile Tat''yana Tarasova.

Näzifä Kärimova “, Mäskäw

XS
SM
MD
LG