Accessibility links

Кайнар хәбәр

Qazan xakimiäte avtobuslarnı beterä


Qazanda transport mä’säläse, şähär xalqın ber tuqtalıştan ikençe tuqtalışqa iltü iñ awırtqan cirlärneñ berse. Ayıruça irtänge, kiçke säğätlärdä keçeräk kenä “Gazel'”gä şıplap tutıralar, hawa yörergä dä urın qalmıy. Qışın tuqtalışta tuñıp torular, şäxsi avtobuslarnıñ ölkän yäştägelärne utırtmıyça qaldırıp kitüläre, çönki tegeläre buşlay yörü tanıqlığı belän, alardan fayda yuq. Qazandağı marşrut avtobuslarınıñ nilär qılanıp yörüläre turında söyli başlasaq waqıt ta citmäs ide. Qayber marşrutlar bik küp aqça eşlilär ikän. Qazan xakimiäte şäxsi passajir yörtüçelärneñ aqçaların sanıy başlağan. Berniçä ay elek marşrut avtobusları öçen şähär idäräse konkursta iğlan itte. Menä dekaber axırlarında yomğaqları bilgele bulaçaq. Monda iñ küp aqça kiterä torğan marşrutlarnı birgännär, şul yullarnı iñ yaxşılarına, xalıqnı uñaylı taşuçılarğa biräçäklär imeş. - Monda iñ köçlelär ciñäçäk. Qaysıları böten taläplärgä cawap birä. Alar şundıy külämdä yaña avtobuslar satıp alırğa tieş, motorı “Yevro – 3” le bulu şart. Kemgä biräsen şähär idäräse üze bilgeli. Qazan xakimiäteneñ transport buyınça cawaplı idärä belän söyläşkännän soñ tübändäge mäğlümatlar bilgele buldı. Başqaladağı xalıqnı utırtıp yörtüçe “Pazik”, “Gazel'” kebek avtobuslarnıñ qullanu waqıtı çıqqan. Ber meñ yarımğa yaqın “Pazik”nı metallomğa ozatırğa bula. - “Pazik”nıñ qullanu waqıtı 3-4 yıl, “Gazel'”neñ 2 yıl. Bezdägelärneñ waqıtları küptän çıqqan inde. Dimäk alar xalıqnı yörtergä tieş tügel. 2007 yılda ayırım şäxsi marşrut avtobusları totuçılar qalmıy. Şähär idäräse alarnı ber zur oyışmağa berläşterä. Xäzerge köndä iske avtobuslar urınına yañaların alu mä’säläse tora. Qazan xakimiäteneñ transport buyınça cawaplı idäräseneñ jurnalistlar belän eşläwçe bülege wäkile süzen däwam itä: - Şähär xakimiäte avtobuslar buyınça törle oyışmalar belän kileşülär alıp bara. Qıtay şirkäte belän, “Nefaz”lılar üzläreneñ avtobusların täqdim itälär. İñ möhime monda maşinalarnıñ sıyfatı, uñaylığı. Bäyäse dä çiktän aşmasqa tieş. Baya digännän, şähär idäräse, bez bäyäsenä qızığıp sıyfatsız maşinalar almayaçaqbız dip tä ışandıra. Avtobuslar satuçı Qıtay şirkäte, Başqortstannıñ “Nefaz” avtobusların çığaruçı häm satuçıları ber-bersenä köndäşlär. Qazan xakimiäte qararı belän 2007 yılda şähär xalqın yä Qıtay avtobusları yäki Rusiädä çığarılğannarı xezmät kürsätäçäk. Yaqınça 1200 yaqın yaña avtobuslar iskelären almaştırır dip kötelä. Läkin çit ilnekeme Rusiäneke älegä äytmilär. Yaña avtobuslar 2007 yılnıñ berençe yartı yıllığında şähärgä çığaçaq. Alar bötenese ber formada, ber töstä bulır dilär şähär idäräsendä. Ayırım “Gazel'”l”är, “Pazik”lar betä. Qayber irekle jurnalistlar bu marşrut avtobuslarındağı üzgäreşlärne yaxşığa yuramıy. Qazan xakimiäteneñ qayda aqça küp şuña tıqşınuı dilär. “Urta biznesnı kiosklarnı, keçeräk kibetlärne beterdelär, xäzer marşrutqalarğa yabıştılar, kiläçäktä restorannar biznesen da üz qullarına alır äle bu yaña Metşin komandası”- digän süzlär dä işetä alar awızınnan. Röstäm İsxaqi
XS
SM
MD
LG