Bu könnärdä Yekaterinburg şähärendä tuğan telne öyränüçe mäktäp balaları qatnaşında Sverdlovski ölkä olimpiadası bulıp uzdı. Anda tatar, başqort, mari telen öyränüçe balalar arasınnan berençe ike turda ciñep çığuçılar qatnaştı. Sverdlovski ölkä mäğärif üsterü institutı metodistı Zäytünä Şäymöxämmätova söyläwençä, berençe tur oktäber-noyäber aylarında rayonnarda uzdırılğan. Dekaber başında ütkärelgän ikençe tur ölkä külämendäge bäygedä qatnaşuçılarnı bilgelägän.
Ölkä olimpiadasında qatnaşu öçen 16 tatar balası, 7 başqort, 7 mari balası kilgän ide. Zäytünä Şäymöxämmätova äytüençä, bäygeneñ xälitkeç öçençe turına iñ köçlelär genä saylanıp cibärelgän. Ä ğomumän alğanda, qatnaşuçılarnıñ sanı küpkä artığraq bulğan. Tatar telennän barısı 54, başqort telennän 24, mari telennän 14 bala qatnaşqan ide, dip belderde Zäytünä xanım.
Biremnär uzğan yıllardağığa qarağanda qatlawlıraq bulsa da, balalar sınatmadılar. Tatar tele buyınça 9 nçı, 10 nçı, 11 nçı sıynıf balaları arasınnan ciñüçelärneñ barısı da Tübän Sırğa rayonınnan kilüçelär. Äçit, Ärtä rayonnarınnan kilüçelär bu yıl uzğan yılğa qarağanda naçarraq näticä kürsättelär. Unbiştän artıq tatar awılı isäplängän Krasnoufim rayonınnan ber genä mäktäp qatnaşmawı da uylanırğa säbäp birä.
Ölkä şähärlärennän olimpiadada Yuğarı Pışma yäkşämbe mäktäbendä uquçılar qatnaştı. Biredä tatar yakşämbe mäktäbe inde biş yıldan artıq eşläp kilä. Tatar tele uqıtuçısı Faina Näcipovna Ğälieva söyläwençä, şähär citäkçeläre tatar häm başqort yäkşämbe mäktäplärenä härdaim yärdäm itep toralar ikän.
Yuğarı Pışma şähäreneñ yäkşämbe mäktäbe oyıştırılğan berençe sanlı mäktäbendä elek citäkçe bulıp eşlägän Tat'yana Sergeevna Kozina xäzer şähär mäğärif bülegen citäkli. Faina Ğalieva äytüençä, ul üze dä elek tatar yäkşämbe mäktäbeneñ iñ aktiv uquçısı bulğan. Yakşämbe mäktäbe oyıştırıluğa 5 yıl tulunı bäyräm itü kiçäsendä Tat'yana Sergeevna tatar telendä qotlaw çığışı yasağan.
Ölkä olimpiadasında qatnaşuçılar arasınnan tatar telen ğomumi häm yäkşämbe mäktäp programmaları qısalarında tügel, ä üzlegennän öyränüçe Pervoural'ski şähäre balaları Älfiä Fäyzullina häm Marat Niğmätullinnıñ eşläre iğtibarğa layık dip tabıldı. Alar ikese dä tatar telen yaxşı belüläre säbäben äti-äniläre belän ğailädä aralaşu dip añlattılar.
Olimpiada mäğärif ministrlığınıñ eş planına kertep uzdırıldı. Balalarnıñ yul çığımnarın rayon mäğärif bülekläre, tuqlanu yaqların mäğärif ministrlığı kütärsä, alarnı ölkä üzägendä urnaştırunı Tatarstannıñ Uraldağı daimi wäkillege tulısınça üz östenä aldı. Bäygeneñ berençe könendä biredä qatnaşuçılar daimi wäkillekneñ zur qunaqları buldılar. Alarnı daimi wäkil Rawil Bikbov üze qabul itte. Qabul itü kiçäsendä qunaqlar aldında “Kügärçen” ürnäk balalar fol'klor ansamble tarafınnan konsert quyıldı.
Bäyge tämamlanğan könne olimpiadada qatnaşuçılar Yekaterinburg şähärendä eşläp kilüçe Milli media-xolding citäkçeläre, ölkä duması tatar deputatları yärdämçeläre, Tatarstannıñ Uraldağı daimi wäkile urınbasarı Xäydär Ğıyl'fanov belän oçraştılar. Oçraşu waqıtında tatar tele uqıtuçıları belän Sverdlovski ölkäsendä milli mäğärif torışı häm kiläse yılda başqarası eşlär turında fiker alışular bulıp uzdı. Olimpiadada qatnaşuçılarğa istälekle büläklär, ciñüçelärgä prizlar tapşırıldı.
Fäwiä Safiullina,Yekaterinburg
