Accessibility links

Кайнар хәбәр

Sember Yaña yılnı ğädättägeçä qarşıladı


Älbättä inde, çırşılar, pirotexnika şartlatular, gülänkelär… häm bäyrämnärneñ cinayätçelek belän tığız elemtäse barlığın tağın ber qat raslaw. Eçke eşlär idäräse wäkile Andrey Yakovleviç belderüençä, bäyräm könnärendä 533 cinayät terkälgän, şularnıñ 237се açılğan. 132 ciñel tän cäräxäteneñ 10 protsentı – ictimaği çaralar waqıtında bulsa, qalğannarı ğailädä - üzara mönäsäbätlär açıqlaw näticäse. Urlaşular küp bulğan. Läkin alarnıñ küpçelege bergä Yaña yıl qarşılawçılar arasında. Monısın yawız niättän tügel - isereklek arqasında ğına dip añlattılar. Massovıyı draki, yäğni ğämmäwi suğışu oçraqları terkälmägän. Citdiräk cinayätlärdän 7 ütereş, 7 aqırtıp talaw, 7 awır tän cäräxäte terkälgän. Älegä şular. Läkin bäyrämnär däwam itä. Rusiä öçen üzençälekle İske Yaña yılğa qädär. 7-nçe ğinwar çaralarına maxsus plan buyınça ictimaği-ğammäwi yal itü urınnarına östälmä militsiä köçläre äzerlängän.

Bäyräm könnärendä 3 kön rättän ölkä xakimiäte binası qarşındağı Lenin mäydanında “Wityaz”, “Ratobor”, “Kremen'” isemle xärbi-tarixi klublar äğzaları “Borınğı Rus'” ratoborlarınıñ niçek üz illären saqlağannarın kürsättelär. 2 – 3 meñ çaması tamaşaçı bolğar kiemendäge ratoborlarnıñ bolğar qoralları belän niçek “İzge Rus'”nıñ doşmannarın qarşılağannarın qaradılar.

Ä şul arada bulaçaq ratoborlar tua tora. Yaña yılnıñ berençe könendä ölkä buyınça 7 bala awaz salğan. Berençese – çegän uğlı Pançenko. İseme dä, bu çegän ulınıñ nindi ratobor bulaçağı da älegä bilgesez.

Ayrat İbrahim, Sember

XS
SM
MD
LG