Bäyräm könnärendä respublikanıñ barlıq diärlek sport komandaları yal it utırmadı, ä törle sport yarışlarında qatnaştı. Qazannıñ Aq bars xokkey komandası Rusiä çempionatında çığışın däwam itä. Yäkşämbe kiçendä anıñ 2007 yılda berençe öy uyını ütte. Aq bars bu yulı Yaroslavl’nıñ Lokomotiv komandası belän uynadı. Bozdağı köräş qazanlılarnıñ ciñüe belän tämamlandı. Uyın 4:1 xisabı belän tämamlandı. Älegä 18 ğinwarğa qädär Aq bars Rusiä çempionatında yalda. Läkin bu qazanlılar älegä yal itä digän süz tügel. Alar Yevropa çempionı kubogı öçen köräşäçäk. Ä menä Qazannıñ Uniks basketbol komandası isä üzläreneñ canatarların quandıra almadı. Yaña yılnıñ berençe uyınında alar Mäskäwneñ Dinamo komandasına ottırdı. Äytergä kiräk, bu bıyılğı sezonda Uniksnıñ berençe ciñelüe.
Xalıqara yarışlarda da tatarstanlılar sınatmıy. Çallınıñ KamAZ-master komandası Dakar-2007 avtoçabışında çığışın däwam itä. Bilgele bulğança, älege yarış 6 ğinwar könne başlanıp kitte. Bıyıl älege ralli Portugaliäneñ başqalası Lissabon şähärendä start aldı. Dakar çabışları avtouzışlar arasında iñ awırlardan, läkin iñ abruylı da bulıp sanala. Ul 15 öleştän tora häm Portugaliä, İspaniä, Marokko, Mavritaniä, Mali, Senegal illäre aşa ütä. Anıñ ozınlığı – 8 meñ kmğa yaqın. Yulnıñ küp öleşe – çüllärdän ütä. Yarış 21 ğinwarda tämamlanırğa tieş. Bıyıl Dakarda iñ küp qatnaşuçılar sanı terkälgän. Oyıştıruçılar süzlärenä qarağanda, anda 240 mototsiklçı, 180 ciñel häm 85 yök maşinasında ekipajları qatnaşa.
Başqa yıllardan ayırmalı bularaq Rusiädän bıyıl çabışnıñ 3 klassında da törkemnär bar. Läkin zur ömetlärne älbättä KamAZ maşinalarına bağlıylar. Äytergä kiräk, Tatarstan komandası Dakarda inde küptännän qatnaşa. Häm şaqtıy uñışlı ğına. Çallınıñ KamAZ-master komandası ekipajları bu çabışlarda inde 7 märtäbä ciñüçe buldı. Uzğan yılnı ğına mäsälän, Vladimir Çagin ekipajı berençe, ä Firdäwes Käbirov citäkçelegendäge komanda öçençe urınnı yawladı. Bıyıl da tatarstanlılar sınatmas kebek. Härxäldä, komandanıñ mäğlümät üzäge süzlärenä qarağanda, bıyıl maşinalar tağı kamilläşterelgän. Şunısın da äytep kitärgä kiräk, KamAZ-master komandası avtomobil’ yarışları buyınça Rusiädä iñ tanılğan häm abruylı törkem. Ul KamAZ şirkäte xezmätkärlärennän tora. Şuña da, alar üzläre yasağan, uzışlarda qatnaşuğa yaraqlaştırılğan maşinalarda çığış yasıylar.
7 ğinwarda Dakar-2007nıñ inde ikençe etabı tämamlandı. Anıñ belän uzışlarnıñ Yevropa öleşe bette. Xäzer yarışlar Afrika çüllärendä däwam itäçäk. Qatnaşuçılar yulnıñ 545 km artta qaldırdı. Dakarnıñ berençe näticäläre dä mäğlüm. Vladimir Çagin citäkçelegendäge KamAZ ekipajı älege ikençe urında bara. Älegä berençelektä barğan de Roy komandasınnan alar nibarı 46 sekundqa qalışa. Qalğan Tatarstan komandaları da ällä ni qalışmıy. Berençe urında toruçılar belän Sergey Reşetnikov ekipajı arasında 13 yarım sekund, ä İlgizär Märdiev alıp barğan KamAZ maşinası arasında 42 minut ara bar. Äytergä kiräk, başqa klasslarda çığış yasawçılarnıñ näticäläre ällä ni ömetländererlek tügel. Mototsikllarda uzışuçılar arasında Rusiä wäkile 219 urında, ä ciñel maşinalarda yarışuçılarnıñ iñ uñışlısı 22 urında bara. Düşämbedä yarışlarnıñ öçençe etabı başlanıp kitte. Anıñ ozınlığı – 648 km.
Gölnaz İlgizär
