Accessibility links

Кайнар хәбәр

Demokratlar Bushnı Ğiraq suğışın cäyeldermäskä çaqıra


Şuşı atnada Quşma Ştatlar prezidentı George Bush Ğiraqtağı yaña strategiäsen iğlan itergä cıyına. Bu kön yaqınlaşqan sayın Washingtonda bäxäslär qıza bara. Kongressnı kontrol itüçe oppozitsiädäge demokratlar Ğiraqta suğışnıñ tağı da cäyelüenä yul quymayaçağın belderä. Läkin alarnıñ üz strategiäse barmı?

"Soraw şul: bez Bushnıñ bu uñışsız säyäsäten alğa taba da däwam itäçäkbezme? Soñğı 12 ayda Bağdadta ğäskärne ike tapqır arttırıp qaradıq. Qızğanıçqa qarşı, administratsiädäge duslarım kiresenä ireşte. Xärbi çişeleşkä qädär, bezgä säyäsi çişeleş kiräk."

Bushnıñ Ğiraq säyäsäten iñ nıq tänqitläwçelärneñ berse Senatnıñ Tışqı bäyläneşlär komitetı başlığı Joseph Biden yäkşämbe Fox News kanalına şulay dide.

Başqa demokrat citäkçelär dä tänqittän tartınmıy. Uzğan comğa Senattağı küpçelek citäkçese Harry Reid belän Wäkillär pulatı räise Nancy Pelosi, aldağı 4-6 ayda Ğiraqtan ğäskär çığara başlarğa çaqırıp, Bush isemenä xat yulladı.

Bush kiresençä, yaña strategiä qısalarında, xärbilär sanın 20 meñä arttırırğa, Ğiraq iqtisadına tağın 1 milliard dollar aqça bülergä, täqdim iter dip kötelä.

Bush säyäsätenä tänqit beldersälär dä, demokratlarnıñ älegä üzläreneñ alternativ strategiäse yuq.

Pelosi häm Reid xäzer şuşı berdäm strategiäne buldırırğa tırışa. Qänäğät bulmağan respublikannarnı da üz yağına cälep iterlek itep.

Yäkşämbedä Pelosi Ğiraqqa soralğan här östämä aqça centekläp tikşerü ütäçäk dide häm dä Bushnı sorağan aqçalarnı ayırıp kürsätergä çaqırdı: qaysı öleşe xäzerge yöklämälärne ütäwgä, qaysı öleşe – ğäskär arttıru öçen.

Ämmä senator Biden fikerençä, Kongressnıñ suğışnı ul qädäre kontrol itü wäkäläte yuq. Bu fiker belän Senattağı respublikannar citäkçese Mitch McConnel da kileşä:

"Kongressnıñ mömkinlekläre çiklängän. Älbättä, ul xärbilärgä aqçanı kimetep qarıy ala, tıñlawlar ütkärä ala, şulay eşlär dä, läkin Kongressnıñ barıber suğış täktikasın üzgärtü wäkäläte yuq, häm bulırğa da tieş tügel" di senator McConnel.

Şulay da, demokratlar Ğiraq mäsäläsen nıqlı kontrolgä alırğa cıyına. Anıñ tiräsendäge tänqit, şaw-şu, cämäğätçelek fikere administratsiägä axır çiktä täesir iter digän ömet belän.

Aldağı 3 atnada Ğiraq mäsäläsendä distälägän tıñlawlar ütäçäk. Bu üze genä dä, moñarçı Bush säyäsäten gel xuplap kilgän Kongres öçen citdi üzgäreş bulıp tora. İxtimal, Bushnıñ Aq Yortta soñğı 2 yılı şulay bäxäslärdä üter dä. İxtimal, Ğiraqnıñ yaña strategiäse şul bäxäslärdä tuar. Quşma Ştalar anda bilgesez waqıtqa qalaçaqmı, ällä inde aqrınlap kitä başlayaçaqmı?

Ali Ğilmi
XS
SM
MD
LG