Yaña 2007 yıl möselmannar öçen ikelätä bäyräm buldı. Udmurtiäneñ yegermedän artıq mäçetlärendä qorban ğäyetlärenä xalıq küpläp cıyıldı. Ağımdağı yılda xacğa baruçılar sanı da artqan. Alar barısı da üz aqçalarına kittelär, dip assızıqladı İjaw Cämiğ mäçete imamı Faiz xäzrät Möxämmätşin.
Bäyrämnärdän soñ Faiz xäzrät 2006 yılda möftilät tarafınnan başqarılğan eşlärgä yomğaq ta yasadı. İñ söyeneçlese — dinne totuçılar sanı arta bara, häm mäçetlärgä ölkännär genä tügel, yäşlär dä küp yöri dip başladı süzen Faiz xäzrät.
Faiz xäzrät süzlärençä, respublikada räsmi räweştä 20дән artıq mäçet eşläp tora. Yaña ğibädät binaları da tözelä. Balezino, Yukamen rayonnarı awıllarında ike mäçet tözelä, alar ağımdağı yılda räsmi açılır dip ömetlänä. Şulay uq Udmurtiä başqalası İjaw şähärendä dä ike mäçet salalar. Anıñ berse şähär urtasında, anıñ inde ike qatı äzer, yaz citkäç anda tözeleş eşläre däwam iteläçäk. Şulay uq İjaw şähäreneñ Ustinov rayonında yäşäwçe din qärdäşlärebezneñ küptänge xıyalı — ul töbäktä keçkenä genä bulsa da mäçet buldıru — tormışqa aşaçaq. Ütkän yılnıñ közendä anda da yaña ğibädät binası tözelä başlandı. Ul mäçet ağımdağı yılnıñ uraza bäyrämenä açırlar dip xıyallana möselmannar.
Mäçetlär qarşında din däresläre alıp barıla, dip däwam itte İjaw mäçete imamı Faiz xäzrät Möxämmätşin.
Ütkän yılda İjaw Cämiğ mäçete qarşında balalar öçen berençe tapqır cäyge lager' oyıştırıldı. Bu ğämällären bıyıl da däwam itärgä niätläre mäçet ähelläreneñ.
Ütkän yılda möselmannarnı borçığan tağın mäs'älä — tatar ziratı tiräsen totu, zirat yanında tärtip urnaştıru buyınça eşlär başlandı. Alarnı başlap yörüçe — İjaw şähäreneñ aqsaqallar şurası räise Şihabetdin Sadıykov. Andağı eşlärne däwam itü öçen şähär byudjetınnan 2007 yılda da aqça bülep birü qaralğan. Şulay itep, möselmannar öçen ütkän yılda baytaq qına ğämällär başqarılğan.
Xämidä Ğayfullina, Udmurtiä
