Bu aralarda bäyrämnär, yallar bulğanğa, Qazanda mädäni tormış ayıruça görläp bara. Bigräk tä balalar öçen törle çaralar küp ütte qışqı kanikullar könnärendä. Çırşı bäyrämnäre, yaña yıl tamaşaları, teatr häm kinolarğa baru häm başqalar. Xäyer, mäktäp yäşendäge balalar öçen genä tügel, ä näniräklär dä onıtılmadı. 23 dekaberdän başlap 9 ğinwarğa qädär Qazanda tatar däwlät “Äkiät” qurçaq teatrı da balalar öçen yaña yıl tamaşaları täqdim itte. Läkin andağı tamaşalar barı tik rus telendä genä uzdı. Älege wazğiättä artistlarnı yäki teatr citäkçelegen ğäyeplärgä aşıqmıyq. Çönki bu qurçaq teatrınıñ tatar telendä spektakl’lär eşlärgä telämäwe yäki telne belgän artistlarnıñ bulmawı belän bäyle tügel. Monda töp säbäp bulıp tatarça spektakl’lärgä tamaşaçılarnı cıya almaw tora ikän.
Balaçaqta qurçaq teatrın ber genä kürgän bala, anı hiç onıtmıy. Qurçaq teatrınıñ canlı qaharmannarı, cır häm iyülläre, söyläşü räweşläre balanıñ xäterendä qala, anı tuğan telgä, milli ruxqa öyrätä. Läkin ni qızğanıç, soñğı yıllarda tuğan teldä uynawçı milli qurçaq teatrı iğtibardan çittä qala. Ölkän yäştäge millättäşlärebezneñ härqaysı diärlek tatarça söyläşkän qurçaq teatrın yaxşı xäterläsä, yäşlär häm balalar üzläreneñ milli teatrları bulğanın belä mikän? Ällä inde mul'tfil'mnar, räsemle kitaplar, komp'yutıyr uyınnarı qurçaq teatrına bulğan ixtiacnı qısrıqlap çığara. Tatar telendä eşli torğan qurçaq teatrınıñ bügenge xäle ciñel tügel, di “Äkiät” qurçaq teatrınıñ citäkçese Roza Cäpparova.
9 ğinwar könne tämamlanğan ike atnalıq Yaña yıl tamaşalarına da rus telendä barğan. Kerü biletları tiz arada satılıp betkän. Ä menä repertuarlarında küp kenä tatar qurçaq spektakle bulsa da, tatarça qurçaq tamaşaçılarına bilet aluçı bik az.
Şulay da üz balalılarına häm onıqlarına tuğan telebezdä äkiät kürsätergä teläwçe milli ruxlı Qazanlılıar da bar. Alar öçen 4 fevral'dä “Maqtançıq ätäç” spektakle kürsäteläçäk. Rusiäneñ törle töbäklärendä meñnärçä tatar balaları berwaqıtta da üz milläteneñ qurçaq teatrın kürmägän häm işetmägän. Ä menä ike million tatar yäşägän Tatarstanda häm 400 meñ millättäşlärebez torğan Qazanda tatar qurçaq spektakl'lärenä üz balaların kiterüçelär siräk. Bu mäsälägä açıqlıq kertü öçen bez Äkiät qurçaq teatrınıñ citäkçese Roza Cäpparovağa möräcäğät ittek.
“Qızğanıçqa qarşı bez yaña yıl bäyräm tamaşaların härwaqıt rus telendä uzdırabız. Rus telendä ütä torğan çırşı bäyrämnärenä ixtiac bik zur. Bu tamaşalarğa biletlar da bik tiz satılıp bette. Ä tatar truppası belän bez 3 ğinwar könne bez islam universitetında buldıq, anda şulay uq yaña yıl tamaşası uzdı. Şunnan soñ Usad mäktäbennän çaqıru alğan idek, şunda barıp qayttıq. Ämma bütän ber cirdän dä andıy şaltıratular bulmadı. Ägär dä teläkläre bulğan rayon, awıl, mäktäp häm balalar baqçalarına bezneñ tatar truppasın üzenä çaqıra ikän, alar barırğa riza. Direktor bularaq äytäsem kilä, siräk kenä şaltıratıp tatar spektakl'lärneñ yuqlığın sorıylar. Alar bar. äytik, bez elek här şimbä könne tatar telendä spektakl' kürsätä idek. Läkin kilüçelär bik az. Bezneñ bilet taratu belän şöğellänüçe xezmätkärlärebez härwaqıt tatar spektakl'lärenä bilet sata almıy aptırap betälär. Şul uq mäktäplärdä, balalar baqçalarında tatar spektakl'lärenä biletlarnı almıylar diärlek. Alar monı ata-analarnıñ balaları belän tatar spektakl'lärenä barırğa telämäwläre belän añlatalar. Tamaşaçı närsä sorıy bez şunı kürsätergä tırışabız inde. Xäzer inde bez ayğa ber tapqır ğına kürsätäbez tatarça spektakl'lärne. Läkin alay da äle, şul 246 biletnı ber cirdän ikençe cirgä yörep köç-xäll satıp beteräbez. Ägär dä alay şulay satmasa ğomumän kassa arqılı 10-15 bilet satıla. Ä rus tamaşalarına äytkänemçä, biletlar kassa arqılı da bik tiz satılıp betä. Şulay uq här yılnıñ noyäber ayında bez böten mäktäplärneñ zavuçların, balalar baqçalarınıñ citäkçelären, RONO xezmätkärlären üzebezdä cıyıp, alarğa repertuardağı tatar spektakl'lären özeklär kürsätäbez, teatrnıñ tarixı turında söylibez, artistlar belän tanıştırabız. Läkin barıber tatar spektakl'lärenä biletlar satu problema bulıp qala birä. ”
Teatrnıñ töp qıyınlığı tamaşaçılarnı cıya almaw bulsa da, teatr bik zur üzgäreşlär kötep yäşi. Tizdän yaña binağa nigez salınaçaq. Waqıtında “Äkiät” tatar qurçaq teatrı binası Qazannıñ 1000 yıllığın bäyräm itügä äzerlek maqsatınnan tözeläçäk obyektlar programmasına kertelgän bulsa da, teatrnıñ yaña binası tözelmi qaldı. Teatr tözeläçäk mäydan da berniçä tapqır üzgärtelde. Başta ul Mullanur Vaxitov häykäle belän Ermitaj baqçası arasında Nekrasov uramınıñ asqı öleşenä tözelergä tieş ide. Ämma älege cir satılğan bulıp çıqtı. Şunnan soñ Prezident Mintimer Şäymiev üzeneñ wäğdäsen istä totıp, yubiley planınnan töşep qalğan qurçaq teatrın tözüne üz qulına aldı. Xäzer isä, qurçaq teatrınıñ yaña binası, elekke “Pobeda” kinoteatrı qarşında urnaşaçaq.
Gölnaz Şäyxetdin
