Törkiä däwlät teleradiokompaniyäse qarşında eşläp kilüçe “Törkiä awazı” radiosınnan yañğırawçı tatar telendäge tapşırular uzğan yılnıñ soñğı könnärendä tuqtap qaldı. 1998 yılnıñ may ayınnan birle qısqa dulqınnar häm internet belän iärçen aşa Törkiä başqalası Anqaradan tatar xalqına ireşep kilgän tapşırularnıñ soñğısı 26 dekaber könne efirğa çığıp qaldı. Tapşırularnıñ tuqtap qaluı – tatar redaktsiyäsendä eşläwçelärneñ sotsial tä’minat-straxovka, daimi eş xaqı, daimi kadrlarnıñ buldırıluı kebek kiräkle eş şartlarınıñ tä’min itelmäwenä bäyle.
Cämğise 26 teldä tapşıruların alıp baruçı “Törkiä awazı” radiosında tatar telendäge tapşırular başlanıp kitkän çaqta redaktsiyädä cämğise 4 keşe eşli ide. Läkin kiräkle sotsial häm eş şartlarınıñ buldırıla alınmawı arqasında här kön ber säğätlek turıdan-turı tapşırunı xäzerläw eşendä soñğı yılda barı tik 2 keşe genä qaldı. Xezmätkärlärneñ berse 11 aylıq kontrakt nigezendä, ikençese isä irekle räweştä, yäğni barı tik gonorar belän genä eşli ide. Törek eş qanunnarı nigezendä 11 aylıq kontrakt nigezendä eşläwçelär waqıtlıça xezmät birüçelär bulıp sanala häm şuña kürä dä 11 aydan soñ eştän çığarıla häm 1 aylıq aradan soñ qabat yañadan eşkä alına. Bu ısul belän kompaniya häm xezmätkärne eştän çığarğanı öçen kompensatsiya tüläwdän häm dä 12 aylıq kontrakt tözemägäne öçen daimi ştatka alu mäcbürilätennän qotıla.
2006 yıl azağında 11 aylıq kontrakt nigezendä eşläwçeneñ möddäte tulğaç, törek radiosındağı tatarça tapşırularında irekle räweştä eşläwçe xezmätkärneñ dä ber ay buyı hiç tuqtamıyça berüze genä eşli aluınıñ mömkin bulmayaçağın beldergännän soñ radio citäkçelege “xezmätkär citmäw probleması xäl itelgänçegä xätle” tatar telendäge tapşırularnı tuqtatıp toru qararına kilde.
Bügenge köndä “Törkiä awazı” aşa tatarça tapşırular urınına törek cırları ğına yañğırıy. Törkiyä başqalasınnan tatar telendä radiotapşırular qabat qayçan efirğa çığa başlar, anısı älegä bilgesez. Ä inde teleradiokompaniyanıñ general direktorınıñ da xökümät belän iñbaşınıñ üzara kileşä almawı arqasında ber yıldan artıq inde äle haman bilgelänä alınmawın da isäpkä alsaq, Törkiädän tatar teleneñ qabat yañğırawı mäs’äläse yaqın waqıtta ğına xäl itelmäs möğayın.
Säğit Xäyri, Änkara
