Accessibility links

Кайнар хәбәр

Yabloko firqәse Piterbur şәhәr şurası saylawlarında qatnaştırılmıy


Rusiәneñ oppozitsiәdәge Yabloko firqәse Piterburda ütәçәk cirle saylawlarda qatnaştırılmıy. Saylaw komissiәse Yablokonı saylawlarğa әzerlek qağiәdәlәren bozuda ğәyepli. Yabloko citәkçelәre isә saylawlardan citlәşterelü partiәneñ xakimiәtlәrgә qarşı qatı oppozitiәdә buluğa bәyle di.

Düşәmbe kөnne Mәskәw Kremle yanına cıyılğan ber yөzlәp keşe Yablokoğa Piterbur şәhәr şurası saylawlarında qatntaşunı tıyu qararına rizasızlıq belderde.

Üzәk saylaw komissiәse Yabloko namzәtlәren yaqlap cıyılğan imzalarnıñ 12-lәp protsentı dөres cıyılmağan di. Saylaw qağidәlәre nigezendә andıy imzalar 10 protsenttan artmasqa tieş.

Yablokonıñ Piterbur bülege başlığı Maksim Reznik isә bu Prezident Vladimir Putinnıñ yaqın berektәşe bulğan Piterbur gubernatorı Valentina Matvienkoğa daimi oppozitsiәdә bulğan өçen Yablokodan üç alu di.

Yabloko citәkçese Grigoriy Yavlinskiy Azatlıq radiosına Matvienko hәm Mәskәw Kremle tawış kütәrüçe kөndәştәn arınırğa teli dide.

"Bu turıda qararnı Piterbur gubernatorı Kreml belәn kiñәşlәşü nigezendә çığarğan. Minemçә Valentina Matvienko şәxsәn Maksim Rezniknı kürә almıy. Çөnki Reznik soñğı yıllarda sotsial hәm sәyәsi mәsәlәlәrgә bәyle küp kenә qararlarğa qarşı aktiv eşçәnlek alıp bardı. Mәğlüm bulğança, bez inde 14 yıl buyı imzalar cıyıp kilәbez hәm bu berqayçan da bezgә qıyınlıq ya problema da bulmadı" dide Yavlinskiy.

Yablokonıñ rәis urınbasarı Sergey Mitroxin Reuters agentlığına Yabloko dәwlәt qaramağındağı Gazpromnıñ klassik arxitekturası belәn tanılğan Piterburda 300 metr bieklektәge bina tөzü planına qarşı çıqqanı өçen dә cәzalana di.

"Yabloko Piterburda Matvienkonıñ berdәn-ber sәyәsi kөndәşe bulıp kilde. Cirle Şuradağı bezneñ wәkillәr Matvienkonıñ gubernator itep bilgelәnüenә qarşı tawış birdelәr. Yabloko Piterburnıñ tarixi yөzen bozaçaq Gazprom City proyektına qarşı kөrәş alıp bara. Şuña kürә Yablokoğa Piterbur saylawlarında qatnaşunı tıydılar" dide Mitroxin.

Qayber sәyәsi küzәtüçelәr fikerençә, bu ğәmәl Mәskәw Kremleneñ bu yıl axırında ütәçәk Duma saylawları hәm 2008-dә ütәçәk prezident saylawları aldınnan kөndәşlәrne aqrınlap utıy başlawı bulırğa oxşıy.

Zamanında әydәwçe firqәlәrneñ berse bulğan Yabloko Putin çorında bik nıq kөçsezlәnde.

Uzğan parlament saylawlarında Yabloko wәkillәre Dumağa kerә almadı. Әmma qayber cirle şuralarda, şul isәptәn Piterbur şәhәr şurasında alar üz urınnarın saqlap qala aldı.

Naif Aqmal, Praga.
XS
SM
MD
LG