Accessibility links

Кайнар хәбәр

Fälästinlelärneñ Xämäs wä Fatah törkemnäre Mäkkädä tatulaşu yulların ezli


Söğüd Ğäräbstanınıñ Mäkkä şähärendä fälästin xakimiäte öçen üzara suğışqan Xämäs häm Fatah törkemnäre citäkçelegeneñ söyläşüläre bara. Yaqlar anda tatulaşu yulların ezli. Mäğlüm ki, şuşı ike törkemneñ fälästin xökümätendäge urınnar öçen ayawsız köräş alıp baruı näticäsendä dikäbrdän birle 80-läp keşe hälak buldı, alar İzrailne tanu mäs''äläsendä dä kileşä almıy.

Xämäs belän Fatah citäkçeläre tatulaşu omtılışların inde elek tä yasap qarağan ide, tik bu älegä qädär bernindi näticägä dä kitermäde. Bu yulı isä ike yaq ta Mäkkädäge oçraşuğa zur ömetlär bağlıy. Älege oçraşu söğüd patşası Ğabdulla ximäyäsendä uza, anı möselmannarnıñ izge urını, Mäkkädä ütkärü dä zur ähämiätkä iä - bu üzara doşmanlaşqan taraflarğa tieşle tä''sir yasar digän farazlar äytelä.

Oçraşuda fälästin prezidentı, berük waqıtta Fatahnı da citäklägän Mäxmüt Ğabbas häm Xämäsneñ säyäsi citäkçese Xälit Meşal qatnaşa. Äzerlek çorında ike yaqnıñ da räsmi wäkilläre, şuşı köndäş törkemnär arasında nindi dä bulsa kileşügä barıber ireşeläçäk, alar hiçyuğı uzğan şimbädän birle ütälgän atışlarnı tuqtatu kileşüen tağın da nığıta ala, dip beldergän ide.

Töp maqsat bulıp qarşılıqlarnı töptän ük çişü tora. Fatah belän Xämäs arasında doşmanlıq ber yıl elek, ğinwarda uzğan saylawlarda küpçelek tawışlarnı Xämäs cıyğannan soñ başlanğan ide. Näticädä ul fälästin xökümäten tözede, ämma prezidentnıñ elegräk Fatahtan saylanuı säbäple, Fatah ta xakimiättän waz kiçärgä telämäde.

İke törkem tarafdarları arasındağı qarşılıqlar axırğı çiktä qorallı bäreleşlärgä kiterde, uzğan dikäbrdän birle şul qan qoyışta 80-läp keşe hälak buldı.

Citmäsä, xökümätne tözegän Xämäs Könbatışta terror alımnarı qullanuda şiklänelä, ul İzrailne ayırım däwlät itep tanımıy, şuña da Könbatış anıñ belän eş itüdän baş tarta. Bu üz çiratında fälästin idaräsenä kürsätelgän yardämneñ dä tuqtalıp toruına kiterä.

Ämma älegä Xämäs üzenä İzrailne tanu maqsatında yasalğan köçle basımnı kire qağa, alay ğına da tügel, elekke fälästin citäkçelegeneñ İzrail belän inde ireşelgän kileşülären tanudan da baş tarta. Anıñ şuşı radikal'' qaraşları İrannıñ xäzerge citäkçelege yağınnan yaqlaw taba, häm bu töbäktäge başqa ğäräp illären, bigräk tä Söğüd Ğäräbstanın poşmanğa sala.

Anıñ fälästin citäkçelären Mäkkägä çaqıruı artında da üzeneñ aradaşçı wazifaların nığıtu teläge yata, dip isäpli Yaqın Könçığış belgeçläre. Soñğı aylarda İran Xämäs aşa fälästin cirlärendä genä tügel, ä Xizbulla xäräkäte aşa Libanda da, şığıy oyışmaları aşa suğış barğan Ğiraqta da üz yoğıntısın arttırdı. Söğüdilärneñ isä nigezdä Fatah belän, Libandağı häm Ğiraqtağı sönnilär belän araları bik yaxşı.

Xämäs belän Fatah arasında oşraşu oyıştırıp Söğüd patşalığı diplomatik initsiativanı üz qulına ala häm aña Mäkkädäge söyläşülärneñ näticäle tämamlanuı kiräk. Anıñ monı fälästinlelärneñ üzlärenä qarağanda da kübräk teläwe bik ixtimal.

Kärim Kamal
XS
SM
MD
LG