Rusiä belän Tatarstan arasındağı şartnamäneñ yazmışı bik qatlawlı buldı. İnde uzğan yılnıñ cäyendä ük äzerlänep betkän häm köz aylarında uq Mintimer Şäymiev häm Vladimir Putin tarafınnan imzalanğan älege dokument inde berniçä märtäbä Rusiä Däwlät Dumasında qaraludan kiçekterelde. Küplär şartnamäne Tatarstan prezidentınıñ tuğan könenä hiçşiksez parlamentta qaralaçaq, dip ömetlänep şaqtıy ğına tırışlıqlar qılsa da, Mintimer Şäymiev üzeneñ yubileyına Mäskäwdän bu büläkne ala almadı. Yä qayber deputatlarnıñ şartnamägä qarata açıqlanmağan sorawları bar, yä Dumanıñ qaysıdır komitetı dokument utırışqa çığarılırğa äzer tügel, digän säbäplär tabılıp tordı. Şuña da, 9 fevral’dä Rusiä deputatları nihayät kileşüne qararğa cıyınalar digän xäbär şaqtıylarnı qızıqsındırdı. Respublikada da küplär tüzemsezlek belän kötä başladı. Tatarstan parlamentı citäkçese Färit Möxämmätşin citäkçelegendäge respublika wäkilläre Mäskäwgä kitte.
Comğa könne dä Şartnamäne Dumada qararğa teläwçelär tik utırmadı. LDPR häm Kommunistik firkä wäkilläre anı tikşermäskä digän täqdim kertep qaradı. Läkin bu täqdim ütmäde. Şulay itep, 9 fevral’dä nihayät Rusiä belän tatarstan arasındağı wäkälätlärne büleşü turındağı şartnamä Duma tarafınnan da qaralıp qabul itelde. Älege xäbär bilgele bulğaç, bez Däwlät Şurası räise urınbasarı Rimma Ratnikovağa möräcäğät ittek. Telefon aşa ul bezgä şartnamä qabul itelüe xaqında niçek belgänen dä söyläde.
Bez äle avtobusta Çallıdan, cıyılıştan qaytıp kiläbez. Yulda internettan, telefon aşa şartnamä qabul itelü turında şatlıqlı xäbärne işettek. 306 deputat şartnamäne yaqlap çıqqan. Bu inde berdäm Rusiä firkäse wäkilläre tawışları. Alar Rusiäneñ çın federatsiä buluı öçen tawış birdelär bügen. Bez moña bik şatTatarstan belän Rusiä arasındağı şartnamä qabul itelügä üz mönäsäbätlären Azatlıq radiosı tıñlawçılarına Räzil Wäliev belän Robert Miñnullin da citkerdelär.
Min üzem şartnamäne äzerläw törkemendä eşläde. Bezneñ tırışlıqlar buşqa kitmäde, şartnamä qabul itelde. Bu Tatarstanğa ğına tügel, Rusiäneñ üzenä dä kiräk ide. Ägär dä Rusiä Däwlät Duması deputatları ilneñ kiläçäge turında uylıylar ikän, alar näq şulay tawış birergä tieş idelär İşetüebezçä, şartnamägä qarşı tawışlar da şaqtıy bulğan ikän. Alarnı da añlap bula, härkem üz mänfäğätlären yaqlıy, bigräk tä xäzer, saylawlar yaqınlaşqan arada. Xäzer inde şartnamäneñ Rusiä federatsiäse Şurasında qaraluın kötäbez. Läkin anda da ul ütär, dip ömetlänäbez. Çönki şartnamä qabul itelmägän oçraqta, ul törle qarşılıqlarğa kiterep çığarırğa mömkin. Bezneñ tatarstanda tınıç, stabil’ tormış dibez, läkin şartnamä qabul itelmäsä, ul kinät kenä qabınıp kitärgä dä mömkin
Gölnaz İlgizär
