Accessibility links

Кайнар хәбәр

Rusiä Islam universitetı yardämgä moxtac


Keşelek faydasına bulğan zur qazanışlar öçen kürenekle säyäsätçelär, cämäğät eşlekleläre, fän häm ädäbiät wäkillärenä birelä torğan bu büläkne islam dönyasınıñ Nobel' büläge dip tä yörtälär. Büläkne alğannan soñ bulğan matbuğat oçraşuında Tatarstan prezidentı üzenä birelgän 200 meñ dollarnıñ küpçelek öleşen Qazan şähärendäge Rusiä islam universitetına büläk itäçägen äytte. Şulay uq Mäskäwneñ Cämiğ mäçete tözeleşenä dä yärdäm tiergä niätli. Rusiä islam universitetı rektorınıñ uqu-uqıtu eşläre urınbasarı Ruslan Tahirov bu xäbärgä bik quanğannarın äytte. Yuğarı uqu yortınıñ ihtıyacları küp buluın da yäşerep tormadı.

-Kapital' remont bulmadı. Aña da kiräk. Yaña däresleklär satıp alu häm bastıru mä’säläse bar. Kompyuter klassına, üzegez beläsez kompyuterlar yıldan-yıl yañarıp bara. Pentiumnar, vindous sistemaları da kiräk. Annarı sport zalı cihazları kiräk. İxtıyclarıbız bik küp.

Ul qädär küp problemalarığız bulğaç, bıyıl Tatarstanda Xäyriä yılı bit, yärdäm qulı suzuçılar da bulğandır inde digän sorawğa Ruslan Tahirov:

-Bügenge köngä qädär möräcäğätlär, täqdimnär bulmadı,-

dip cawap birde. Rusiä islam universitetı rektorı uqu- uqıtu eşläre urınbasarı süzlärençä bıyıl bu uqu yortın 15-20 keşe tämamlarğa tieş.

-Üzegez beläsez, bezneñ universitetnıñ bazası şundıy,- di ul.

Rusiä islam mäğärife şurası räise, Mäskäw islam universitetı rektorı Marat Mortazin äytüençä, yaqın kiläçäktä meñgä yaqın din ähele äzerlänep, mäçetlärdä ruxanilarğa moxtaclıq betäçäk. Bügen Rusiädä 12 dini yuğarı uqu yortı bar. Alar Dağıstan, Qabarda-Balqar, Başqortstan, Tatarstan häm Mäskäwdä eşli. Annan da qala törle töbäklärdäge distälärçä mädräsälär urta häm yuğarı dini belem birä. Yäkşämbe mäktäpläre eşläp kilä. Rusiä islam mäğärife şurası başlığı Marat Mortazin äytüençä, yaqın kiläçäktä Rusiädäge dini yuğarı belem birü biş töp universitet üzägenä tuplanaçaq. İslam mäğärifeneñ böten tarmaqların da üz tiräsenä tuplağan bu universitet üzäklären tözü programması äzerlänä başlağan inde. Mortazin äytüençä, Mäskäw islam universitetı, Qazandağı Rusiä islam universitetı, Ufadağı Rizaetdin Fäxretdin isemendäge islam institutı, şulay uq Seberdä häm Tönyaq Kavkazdağı yuğarı uqu yortları üzäkkä äylänäçäk. Qazandağı Rusiä islam universitetında üzläreneñ kiläçäktä üzäk bulu ixtimalı turında xäbärdar tügellär. Rektorınıñ uqu-uqıtu eşläre urınbasarı Ruslan Tahirov, bu xäbär turında işetkänebez yuq, dide.

Nail Alan

XS
SM
MD
LG