Kitap näşer itü awır tügel, anı satuı qıyın dielde utırışta. Añlaşıla ki Mäskäw häm Sankt-Peterburg kebek zur şähärlärdä ber törle mäs'älälär torsa, Rusiäneñ keçeräk töbäklärendäge kitap näşer itüçelären bötenläy ikençe problemalar borçıy. Älege ike könlek cıyınnı Mäskäw wäkilläre oyıştırğanlıqtan töbäktäge wäkillär älläni fayda ala almadılar. Bügen küp kenä poligrafiä cihazları çit illärdän qaytarıla, yaxşı käğäz qimmät tora. Şulay itep keşe küzen qızıqtıra torğan kitap çığaru 20 meñnän 1 millionğa qädär töşä. Mäskäwdä uza torğan “Rusiä kitapları” kürgäzmäsendä dä töbäklärdä çıqqan kitaplar küp oçraqta yuğalıp qala ikän. Şuña xäzer “Malaya Rodina – Keçe Watan” digän maxsus töbäktä çıqqan kitaplar öçen bäyge oyıştırılğan. Läkin küp kenä kitap näşer itüçelär üzlärendä çıqqan basmalarnı şaqtıy maqtıy. Mäsälän “İdel-Press” näşriäte citäkçese İslam Äxmätcanov xätta Xalıqara kürgäzmälärdä dä Tatarstan kitapları başqalardan qalışmıy dip assızıqlıy. Qıyınlıqlar turında İslam Äxmätcanov:
Ber-bereñne qabatlawlar bar. Mäsälän Başqortstanda da, Tatarstanda da ber ük kitaplar çığa ana telebezdä. Bügen Tatarstanda 60ка yaqın näşriät bar. Alarda da şul kitaplar basıla. Menä bügen urtaq bağlanışlar turında söyläşergä kiräk. Annan soñ bit äle bez nindi qanunnar nigezendä eşlärgä tieşbez. Bezneñ xoquqi qanunnarıbız barmı. Bu yunäleştä dä üz nıqlı süzebezne äytergä tieşbez.İslam Äxmätcanov äytüençä, çit cirlärdä tatar kitaplarına ixtıac zur. İslam Äxmätcanov:
Bez yıl sayın Mäskäwdä kürgäzmälärdä qatnaşabız häm üzebezneñ ürnäklärebezne alıp barabız. Bezne ana telendä nigä kübräk kitaplar alıp kilmisez dip sügälär. Läkin bez bit satuğa tügel, ä kürsäter öçen genä alıp barabız. Mäskäwdä kürgäzmälär waqıtında ber köndä 25-30 meñ kitap satıp betergänebez bar.“İdel-Press” näşriäte citäkçese İslam Äxmätcanov äytüençä kitap çığaru öçen berençe çiratta zamança cihaz kiräk - ul Tatarstanda buldırılğan häm bezneñ köndäşlekkä sälätebez bar dielde.
Utırışta äytelgänçä, kitap näşer itüne üsterü öçen berençe çiratta uquçılarnı arttırırğa kiräk. Xäzer näq töbäk komponentı bularaq “Uqunı yaqlaw” digän proyekt buldırılğan. Anıñ qısalarında töbäk citäkçeläreneñ yärdäme kiräk bulaçağı äytelde – aqçalata tügel, ä menä näq oyıştıru mä’säläsendä. Älege utırışta qatnaşqan Tatarstan Däwlät Şurası räise urınbasarı Rimma Ratnikova da, Mäskäw rayonı başlığı Aleksandr Lobov ta bu yunäleştä Tatarstanda eş yuğarı töstä bara dip bilgeläp uzdılar.
Landış Xarrasova.
