Accessibility links

Кайнар хәбәр

Udmurtiädä tatar kitabı dönya kürde



Yäşim äle yaqtı ömet bağlap, Kiläçäkkä, irtä, bügengä Moñlı canım, meñ kisäkkä yarıp, şiğri yullar töşä küñelgä.

Şuşı yullar belän başlanğan yaqtaşıbız Gölfiä İsxaqovanıñ İjawda äle genä basılıp çıqqan «Aq moñ alıp qayınnardan» dip isemlängän şiğerlär cıyıntığı. Bu - Gölfiä İsxaqovanıñ ikençe kitabı. Cıyıntıq avtorğa ikelätä qäderle – ul anıñ näq ille yıllıq yubileyına äzer buldı. Avtor 50 yäşen 15 fevraldä bilgeläp ütte.

Gölfiä İsxaqova Votkinsk qalasına Tatarstannıñ Älmät töbägennän küçep kilgän. Küp yıllar zavodta eşli, xorğa yöri, şiğerlär xikäyälär yaza. Votkinsk şähärendä yäşäwçe moñğa, cırğa tartılğan millättäşlärebezne un yıl elek «Turğay» ansamblenä tuplıy. Ul äle konsertlar alıp baruçı, kiçälär oyıştıruçıda... Milli xäräkätneñ iñ aktiv äğzalarınıñ berse. «Turğay» ansamble cırçısı Qadriä Mannanova süzlärençä, Gölfiä İsxaqova tatar üzägen oyıştırunı başlap yörüçe, tatar sıynıflarına balalar tuplawçı, matur şiğerlär avtorı.

Gölfiä İsxaqovanıñ şiğerläre, qızıqlı xikäyäläre, waqiğalarğa bağışlanğan yazmaları Udmurtiä tatarlarnıñ cirle basması «Yañarış» gazetası bitlärendä yış kürenä. Gölfiä İsxaqovanıñ şiğerläre Udmurtiä cirendä ğömer itüçe avtorlarnıñ berençe kitabı «Yazmışlar awazı» cıyıntığında da basılıp çıqtı.

2002 yılda Gölfiä xanımnıñ möstäqıyl'' «Yazlarıma qaytam» isemle şiğerlär cıyıntığı dönya kürde. Şulay uq avtornıñ şiğerläre, yazmaları belän Tatarstanda çığıp kilüçe küp kenä basmalarda da tanışırğa mömkin.

«Gölfiä İsxaqovanıñ berkemne dä qabatlamıy torğan üz ahäñe, üz ruxi dönyası bar», – dip yaza äle genä näşriättä basılğan «Aq moñ alıp qayınnardan» isemle kitabınıñ kereş süzendä Tatarstan yazuçısı Şahinur Mostafin. Ayıruça anıñ şiğerlären xatın—qızlar yaratıp uqıy. Bu fikerlärne «Turğay» ansamble cırçısı Räfiä Xäkimova citkerde .

Üzeneñ icatqa yulı turında Gölfiä İsxaqova bolay

iskä alıp, mäktäptä uqığanda «Yäş leninçı» gazetasına şiğerlären yullawın, alarnıñ tänqit süzlärenä üpkäläwen citkerde….»

Gölfiä İsxaqova şiğerläreneñ tematikası kiñ. Lirik şiğerlär küpçelek urın ala, ämma äxlaq-iman däresläre dä birä ul, milli xisle yulları da şaqtıy.

Gölfiä İsxaqova süzlärenä yegermedän artıq cır da yazılğan. Avtor alarnıñ qaysıların üze başqara da.

Gölfiä İsxaqovanıñ ikençe qızı Güzälgä dä äniseneñ säläte birelgän. Gölfiä xanım süzlärençä, qızçıq keçkenädän ük şiğerlär yaza başlağan, alarnı üze kitapçıq itep terkäp tä barğan. Bügen äniseneñ arxivında şuşındıy berniçä kitapçıq saqlana. Güzälneñ şiğerläre belän ike teldä tösle itep yasalğan ike kitabı Tatarstan näşriätında basılıp çıqtı. Ul ğına da tügel, Gölfiä xanım äytüençä, Güzälneñ «Kerpe» isemle kitabı iñ küp soralğan kitaplarnıñ berse ikän.

Şiğriätkä säläte Güzälne jurnalistika fakul''tetına kiterä. Qızınıñ, üzeneñ dä tağın küp kenä şiğerläre, mäqäläläre, xikäyäläre cıyğan. Kiläçäktä alarnı da ber cıyıntıq itep çığarırğa niäte Gölfiä İsxaqovanıñ.

Xämidä Ğayfullina, Udmurtiä

XS
SM
MD
LG