Tatar däwlät gumanitar pedagogika universitetınıñ Puşkin uramı 32а adresı buyınça urnaşqan berençe tulay torağında moña qädär tınıç bula. Studentlar, ğailälelär, çit ildän kilgän şäkertlär toruçı älege tulay toraqta cämğısı 925 keşe yäşägän. “Xäzer 924kä genä qala inde…”- di studentlar yortınıñ citäkçese Nina Zaxarova. Pedagogika universitetınıñ rus filologiäse fakul'tetınıñ berençe kursında uquçı Tanya Gulyaevada şuşı lenin baqçası tuqtalışındağı berençe tulay toraqta tora.
1989 yılnıñ 13 avgusta tuğan Tanya Gulyaevanıñ ğömere tulay toraqqa kerä torğan ike işek arasında faciğäle töstä özelä. 16 fevral' könne 15.30 minutlar tiräsendä universitetınıñ berençe studentlar yortınıñ işek töbendäge saq xezmäte tışqı yaqta, ike işek arasında, tambur kebek urınnan açırğalanıp qıçqırğan qız tawışın işetälär. Bu xaqta bezgä, üze dä şunda bulğan tulay toraqnıñ citäkçese Nina Zaxarova söyläde. Alar işek artında tawış işetkäç, çit ildän kilgän student belän işekne açırğa mataşalar. Läkin işek açılası yaqqa üterüçe Tanyanı audarğan bula, üze gäwdäse belän etep tora. İşek açılğanda üterüçe üz eşen eşlägän bula inde. Keşe ğömeren özüçe pıçağın taşlap kitä başlıy, anı militsiägä şaltıratıp quyıp çit ildän kilgän ike student yegetlär qurqıp qalmıyça, quıp totalar. Tulay toraq citäkçese söyläwe buyınça bu ir-at taza gäwdäle, äybät kiengän bula. Wäxşilärçä ğämälen ul tübändägeçä añlata, di Tatar däwlät gumanitar pedagogika universitetınıñ ğomumi eşlär buyınça rektor urınbasarı İlgiz Abdullin:
- İmeş qıznıñ änise bu ir-atqa spid yoqtıra, şuña ul üç almaqçı bula.
Faciğäle töstä dönyadan kitkän Tanyanıñ äniseneñ süzläre başqaça yañğırıy dilär:
- Tanyanıñ änise äytüe buyınça, bu üterüçe ir-at älege xatınğa 12 yıl buyı üzenä kiäwgä çığarğa öndi. Dönyadan kitkän qıznıñ änise baş tarta.
Sez İlgiz Abdullin süzlären işettegez.
Tulay toraqta torğanda da tınıç qına, basınqı ğına yöri torğan qız bula Tanya. Änise Bua rayonında ipi peşerüçe bulıp eşli. Üterüçe dä şul uq rayonnan bula. Bu universitetnıñ qayber studentları üterüçe ir-at äniseneñ söyärkäse bulğan dip tä äytälär. 18 fevral'dä Tanya Gulyaevanı tuğan yağı Bua alıp qaytıp cirlilär.
Röstäm İsxaqi
