Tatar häm başqort dairäläreneñ ber öleşe arasında mönäsäbätlär äledän-äle kiskenläşep tora. Soñğı bäxäslärgä Ufa şähärendäge tatar gimnaziäsen cimertü kebek ğämäl cirlek birde. Cimerü uñayınnan här ike yaq ta törle yassılıqta üz fikeren äytä tora. Näq menä şuşı väzğıättä Başqort Däwlät Akademiä teatrı Çallı şähärendä gastrol'lären başlap cibärde.
20 fevral'gä Mäcit Ğafuri isemendäge Başqort Däwlät Drama teatrı artistları Çallığa bulğan gastrol'läreneñ 3 könen ütkärgännär ide. Şuşı 3 köndä şähärneñ iñ zatlı mädäniät yortında- Sara Sadıykova isemendäge konsert zalında xalıqqa 3 törle tamaşa täqdim itelde. 18 fevral'dä Akademiä artistları teatrlı konsert kürsättelär. 19гызында kiç belän başqort dramaturğı Bayäzit Bikbaynıñ "Qodaça"spektaklen, ä köndez balalar öçen Daniä äkiätçese Xristian Andersennıñ "Qar patşabikäse" tamaşasın kürsättelär. Fevral'neñ 20 Çallı tamaşaçısı şulay uq çit il dramaturgı Raffi Şartnıñ "Xatınımnıñ iseme Moris" äsären qaradı. Şuşı uq tamaşalar aldağı öç köndä şähärneñ "Energetiklar" mädäniät sarayında qabatlanaçaq. Başqort xalqınıñ iñ däräcäle teatr kollektivın Çallı tamaşaçısı niçek qarşı alğan? Başqort akademiäçeläreneñ säxnädä uynawların Çallılar niçek qabul itä? Bu sorawlarğa Başqort Akademiä Teatrınıñ bülek mödire Rozaliä Şäyaxmätova häm Çallınıñ tanılğan mädäniät, sänğat bülege Fänil Salixov Azatlıqqa bolay didelär:
- Bez Çallı duslarıbızğa kilü belän bik bäxätle. Bik matur qarşı aldılar, tamaşalarğa xalıq bik küp kilä. Xalıq küp bulğaç, bezgä dä räxät. Monıñ öçen Çallıdağı tatar duslarıbızğa zur räxmät. Tağın kilergä ömetlänep qalabız.
- Berençe tamaşalardan başlap bezneñ Çallı xalqı başqort kollektivın bik cılı qarşı aldı. Artistlarnıñ başqaru, uynaw, däräcäläre bik yuğarı. Kilgän här tamaşağa qanäğät'länü xise belän qaytıp kitäder dip uylıym.
Başqort Akademiä Teatrınıñ Çallıda barğan gastrol'läre xaqında teatrnıñ bülek mödire Rozaliä Şäyaxmätova häm Çallıda yäşäwçe mädäniät belgeçe Fänil Sälixov fikerläre buldı.
Şähärneñ mäğärif idaräse dä mäktäplärgä uquçı tatar balaların başqort sänğatkärläre icatı belän tanıştıruda tırışlıq kürsätte. 19 fevral', köndezge 11 säğättä bulğan äkiät-tamaşağa 800 bala däreslärdän qaldırıp kitergännär ide.
Ğafiulla Ğaziz , Çallı
