Şuşı könnärdä Premyer-ministr Röstäm Miñnexanov räislegendä Transport häm yul xucalığı ministrlığınıñ uzğan yıl näticälärenä bağışlanğan kollegiä utırışı uzdı. Utırışta “Tatarstan” hawa şirkäte citäkçese Möxämmät Zakarcaevka Xökümät başlığınnan şaqtıy kisken tänqit süzläre işetergä turı kilde. Hawa transportı federal' agentlığı häm Transport ölkäsen küzätüçe federal' xezmätneñ "Tatarstan" aviaşirkäte öçen Yevropağa hawa yulın yabıp quyuı mäsäläsenä tuqtalıp, Röstäm Miñnexanov Tatarstan hawa şirkäte citäkçelegenä şeltä belderde. Anıñ fikerençä, şundıy citdi säbäplär tabılğan oçraqta citäkçe keşe tınıç, salqın qanlı bulıp qalırğa tieş tügel. Soñınnan isä “Tatarstan aviatsiäse sistemasın Awropa däräcäsenä citkerüdä citdi mönäsäbät kürsätü zarur”, - dip ämer birde premyer-ministr. Röstäm Miñnexanov äytüençä, bıyıl may ayında Awropa tözekländerü häm üseş bankı idärä itüçeläre şurasınıñ yıllıq utırışına qädär aviatsiä torışın tärtipkä kiterü möhim. Şunı äytergä kiräk, älegä “Tatarstan” hawa şirkäte citäkçese Möxämmät Zaqarcayıvnıñ eşennän azat itelü turında räsmi xäbär yuq. Gölnaz Şäyxetdin
