Accessibility links

79. Oscar tantanası: Martin Scorsese nixayat "iñ yaxşı rejisser" dip ataldı


Düşämbegä qarşı töndä Los Angeles şähärendä kino dönyasınıñ töp waqiğası bulıp uzdı. Qazanda inde tañ atqanda, Hollywoodta, inde 79nçı märtäbä, mäşhür Oscar büläklären tapşıru tantanası ütte. İñ yaxşı rejisser isemenä bu isemgä inde küptän däğwa itkän Martin Scorsese laıyq buldı.

Büläkneñ Martin Scorseseğa birelüe turında anıñ dustı, tanılğan rejisser Steven Spielberg iğlan itte. 64 yäşlek aqsaqalnı säxnädä anıñ tağın ike dustı, şulay uq mäşhür rejisserlar – Francis Coppola, George Lucas sälämläde. Scorsese, bu isemgä inde 6nçı tapqır däğwa itsä dä, anıñ äle Oscar bülägen alğanı yuq ide. Akademiä äzğaları, Hollywood yoldızları aña ayaq ürä basıp alqışladı. Scorsese bu hörmätkä bik nıq dulqınlanuın äytte:

"Akademiäneñ xörmäte häm dä büläkne küptänge duslarım qulınnan alu – bu is kitärlek. Bez inde 37 yıl tanış. Min bik nıq dulqınlanam" di Martin Scorsese.

Scorsese töşergän "Taşlandıqlar" ("Departed") isemle film yılnıñ iñ yaxşı filmı dip tabıldı. Bostondağı oyışqan cinäyätçelek, yäşeren politsiä agentları turındağı bu film barlığı 4 büläk aldı.

İñ yaxşı aktrisa isemenä "Patşabikä" ("The Queen") isemle filmda Elisabeth patşabikäsen uynağan Helen Mirren layıq buldı:

"Zur räxmät siña, Akademiä. Bu bik zur xörmät. Señlem äytüençä, balalar mäktäptä altın yoldız bilgese alırğa yarata. Bu minem tormışımda iñ zur altın yoldız. Min anı başqa nazmätlär, ğäcäyep ostalıq kürsätkän iskitkeç aktrisalar belän urtaqlaşırğa telim" di Helen Mirren.

İñ yaxşı akter isemenä "Şotlandiäneñ soñğı patşası" ("The Last King of Scotland") filmında Uganda diktatorı İdi Amin bulıp uynağan Forrest Whittaker layıq buldı.

"Bu büläkne alu miña här närsä mömkin buluın kürsätte. Könçığış Texasta tuıp, Los Angeles häm Carsonda üskän ğadi malayğa, üz xıyalına ışanıp, anı tormışqa aşırır öçen canın birgän keşegä bu zur xörmät" di Forrest Whittaker.

İñ yaxşı yärdämçe rol öçen büläkne "Xıyal qızları" ("Dream Girls") filmında 3 cırçı qıznıñ bersen uynağan 25 yşlek elekke televidenie moderatorı Jennifer Hudson aldı.

İrlär arasında bu büläk "Bäxet qoşçığı" ("Little Miss Sunshine") filmında narkotik qullanuçı babaynı uynağan 72 yäşlek Alan Arkinğa birelde.

İñ yaxşı dokumental film dip dönyadağı cılınu mäsäläsen kütärgän "Uñaysız xaqiqät" ("An Inconvenient Truth") isemle filmı tabıldı. Büläkläw tantansında qatnaşqan Quşma Ştalarnıñ elekke vitse-prezidentı Al Gore dönyadağı cılınunı çorıbıznıñ töp äxlaqi mäsäläse dip atadı.

İñ yaxşı çit il filmı dip Germaniädä töşerelgän "Başqalar tormışı" ("The Lives of Others") digän film ataldı. Bu film 1980. yıllarda Könçığış Germaniädä ştazi küzläwe astında yäşägän dramaturg häm anıñ söygän aktrisası turında.

79. Oscar tantanasınıñ iñ zur yuğaltuçısı dip "Vavilon" ("Babel") filmın atarğa buladır. 4 ildän, Morocco, Quşma Ştatlar, Yaponiä, Mexicodan, 4 ğailäneñ üz-ara kiseşkän tormışın sürätlägän bu film 7 nominiatsiädä kürsätelgän ide. Läkin ber genä büläk ala aldı, iñ yaxşı muzıka öçen.

Ali Ğilmi
XS
SM
MD
LG