Accessibility links

Кайнар хәбәр

Gruziä prezidentı Mixail Saakaşvili Yewropada yaqlaw ezli


Brüsseldä öç könlek säfär belän bu könnärdä Gruziä prezidentı Mixail Saakaşvili yöri, xörmätle tıñlawçılar. Anda Yewropa Berlege häm NATO citäkçeläre belän alıp barğan söyläşülärendä ul üz ileneñ şuşı ike oyışma belän araların nığıtu yulların tikşerä. Säfäreneñ berençe könendä Saakaşvili, Gruziä NATO belän inde küpkä ışanıçlıraq atlıy, dip beldergän ide. Anıñ şul süzlärennän añlaşılğança, Gruziäneñ NATOğa kerü ixtimalı xäzer tağın da yuğarıraq.

Brüsseldä Mixail Saakaşvili NATO ğına tügel, Yewropa Berlege citäkçeläre belän dä oçraşa, ämma NATOdan ayırmalı bularaq, näq menä Yewropa Berlege yağınnan Tifliskä älegä uñay xäbärlär ällä ni kilmi. Yewropa Berlegeneñ kiläçäktä üzen tağın da kiñäytügä küñele yatmawı kiñ mäğlüm.

Monı Saakaşvili dä yaxşı belä. Berlekneñ tışqı säyäsät wä iminlek ölkäsendäge yuğarı wäkile Javier Solana belän oçraşqannan soñ ul "bez Yewropa Berlege işegenä qaqmıybız da, çönki sezneñ açunı qabartasıbız kilmi", dip belderde. Anıñ urınına Tiflis aralarnı äkrenläp, ämma özlekle töstä nığıtunı yaqlıy, di Mixail Saakaşvili:

"Bez telägän närsä şul - viza alularnı ciñeläytü, bigräk tä yäşlär, eşmäkärlär öçen, ä soñraq inde bar xalıq öçen dä. Bezgä säwdäne yaxşırtu kiräk, asılda irekle säwdä kertü yaxşı bulır ide, häm bez şuñardan mömkin qädär kübräk fayda kürü yulların belergä tieş. Ğomumän, bez Yewropa Berlegendä äğzalıqnı küz aldında totmağan, ämma şuña yaqın torğan bar närsäne dä eşlärgä tieş", dip bilgeli üz ileneñ Yerwopa belän araların nığıtu yulların Gruziä prezidentı Mixail Saakaşvili.

İnde telgä alınğan Javier Solana düşämbedä, Yewropa Berlegeneñ Gruziä belän tirän wä tığız mönäsäbätläre bar, min moña ifrat ta qänäğätmen, dip beldergän ide. Berük waqıtta ul Berlekneñ Gruziä belän mönäsäbätläre Kavkaz töbägendäge Ärmänstan häm Azärbaycan belän bulğanınnan ayırılmıy, Yewropa bar şul töbäk belän berdäm eş itärgä teli dip tä östäde.

Solana Saakaşviline ikençe ber möhim ölkädä yaqlap çıqtı. Tiflisneñ üzendäge milli azçılıqlar - osetinnar häm abxazlar belän bulğan nizaqlarında Yewropa Gruziäneñ territorial bötenlegen tanıy:

"Bezneñ biredä Yewropada Gruziäneñ territorial bötenlegenä ışanuğa zur ähämiät birüebezgä ayıruça basım yasarğa telär idek. Gruzinnar şulay uq bezneñ yaqlawğa iä bulaçaq, ägär dä bez nindi dä bulsa yardäm kürsätä alabız ikän, bez bulışaçaqbız", dip belderde Mixail Saakaşviligä Yewropa Berlegeneñ tışqı säyäsät häm iminlek ölkäsendäge yuğarı wäkile Javier Solana.

NATO mäs''äläsenä kilgändä, Saakaşvili belderüläre küpkä kütärenke ide. Ul xäbärçelärgä, Tiflis NATOdan äğzalıqqa äzerlek planın täqdim itüne kötä, bu şuşı yıl azağında yäisä 2008-neñ başında bula ala, dip belderde. Bu plan asılda NATOğa kerüne inde garantiäli.

Kärim Kamal
XS
SM
MD
LG