Qış aynıñ soñğı köne — 28 fevral'dä Udmurtiädä yäşäp icat itüçe şağir, Tatarstan Yazuçılar Berlege äğzası İbrahim Biektawlığa 70 yäş tuldı.
İbrahim Biektawlı iseme uquçılarğa yaxşı tanış. Avtornıñ şiğerläre ayıruça yuğarı zäwıq, neçkä obrazlı ädäbi çağıştırular, üzeneñ genä xas bulğan romantika häm yañaça süzlär qullanılıp yazılğan. Belgeçlär alarnı yuğarı şiğriät digän termin belän atıy. «Yuğarı şiğriät äsärläre ğasırlar öçen yazıla. İbrahim Biektawlı şiğerlärenä dä şundıy yazmış telim»,- dip yaza qälämdäşe Ğimran Safin.
İbrahim Biektawlı belgeçlege buyınça injener, ul Qazan aviatsiä institutın tämamlağan, yullama belän İjaw radiozavodına eşke kilep urnaşqan. Ruxı eçtälege, baylığı belän çın şağir İbrahim Şäydulla ulı. Avtornıñ här yulında tirän fiker, töple süz, olı mäğnä yata.
Anıñ şiğerläre küp külämdä Udmurtiä cirendä yäşäp icat itüçe tatar avtorlarınıñ täwge «Yazışlar awazı» isemle kitabında basılıp çıqtı. Beraz soñraq İbrahim Biektawlınıñ berniçä «Qotlawlar kitapları» dönya kürde. İbrahim Biektawlınıñ 2001 häm 2005 yıllarda İjawda «Cirdän cide cihanğa» häm «Ğäläm serläre» dip atalğan ike şiğerlär cıyıntığı basılıp çıqtı. Kitaplarnıñ töp fikere - dönya iksez-çiksez simfoniä, ä Keşe Ğömere ul – qısqa xikäyät. İbrahim Biektawlı süzlärenä kompozitorlar köylär dä yazğan. Alar notalar belän maxsus kompozitorlarıbız cıyentığında dönya kürde. Şulay uq avtornıñ rus telendä yazılğan şiğerläre dä şaqtıy. Alar da törle matbuğat bitlärendä basılıp çıqtı.
Xämidä Ğayfullina, Udmurtiä
