Başqortstannıñ Täteşle rayonında “Könbatış başqortları telen üsterü” digän temağa zur cıyın bulıp ütte. Bötendönya başqortları qorıltayı tarafınnan oyıştırılğan bu çarağa xätta Perm kraennan häm Çiläbe ölkäsennän dä qunaqlar kilde.
Täteşle rayonı küpçelek xalqın tatarlar täşkil itkän töbäk. Tatarlardan soñ anda ikençe urınnı udmurtlar häm öçençe urınnı urıslar bili. Şulay da Bötendönya başqort qorıltayı wäkilläre Täteşledä yäşäwçe tatarlarnı üzläreneñ milli üzañın yuğaltqan häm ana telläre tatarlaşqan başqortlar dip isäpli. Şuşı uq fiker äle Täteşledä ütkän cıyındağı çığışlarda da yış yañğıradı. Başqort qorıltayı räise Rumil Aznabaev zalda cıyılğan Täteşle tatarların “sez başqortlar häm sez üz asıllığızğa qaytırğa tieşsez” dip açıqtan-açıq äytte.
“Könbatış başqortları” digän terminnı soñğı un-unbiş yılda başqort milli oyışmaları wäkilläre häm başqort ğalimnäre yış qullana kilde. Xäzer inde bu yunäleştä täğäyen eşlärgä küçä başlarğa isäp totıla.
Başqortstan tatar oyışmaları isä “könbatış başqortları” digän töşençä bötenläy uydırma närsä dip belderä. Täteşledä uzğan cıyınğa bäyle üz mönäsäbäten belderep, monı Başqortstan Tatar ictimaği üzäge räise Ayrat Ğiniätullin da äytte.
“Bu cıyınnıñ maqsatı – Başqortstandağı tatar rayonnarında yäşäwçe millättäşlär añına “sez tatarlaşqan başqortlar” digän fikerne tağu yünäleşendäge çirattağı çara, - di Ayrat äfände – Soñğı xalıq isäben alu barışında “başqort” dip yazdırılğan tatarlar arasında ruxi eşkärtü bara.
