Accessibility links

Кайнар хәбәр

Samar saylawları tınıç uzdı


Martnıñ 11- dä Samarda Guberna Dumasına saylawlar uzdı. Bu yulı saylawçılar konkret familiäle kandidatqa ğına tügel, ä säyäsi firqälärne dä üz küzleklärennän çığıp bäyälädelär.

Berençedän, saylawçılarnıñ tik 37%-ı ğına üz fikerlären belderdelär, küpçelekne täşkil itkän 63% saylawçı bitaraf häm berkemgä dä yä ışanmıy, yä yalğannan arığan adäm.

Döres, tatar, çuaş, muqşı kübräk yäşägän töbäklärdä saylaw uçastoklarına xalıqnıñ 65- 83 %-ı kilgän, häm tağın ber üzençälek – deputatlıqqa barğan nämzätneñ xalıq arasında yaxşı tanış buluı- elekkege Duma räise Viktor Sazonov Samarnıñ eşçelär bistäsendä saylawçılarnıñ 51%-ın üz yağına audara alğan. Ä inde tatarlar küp yäşägän saylaw okrugında tatarıbız Ğömär Välitov uza almadı, şul töbäktä administratsiä başlığı bulıp eşläwçe Vasiliy Potyäkin uzdı. Ul tawışlarnıñ 70%-ın cıyğan. Ğömär Välitovqa awıldaşları 90% tawış birgännär, ä menä Välitov äytüençä, başqa awıllarda xalıq belän oçraşırğa irek birmägännär. Administrativ resurs bar qüätenä “Berdäm Rossiä” firqäsenä eşlägän.

Tözüçe, zur citäkçe Minnäxmät Xalliulov Samarnıñ üzendä köçen sınap qaradı, ul da uza almadı.

Guberna saylawlarında 7 säyäsi firqä qatnaştı, “Rossiä patriotları” 7%-ı kirtäne uza almadılar, alar saylawçılarnıñ 1,4%-ın ğına cıya aldı, şuña da Samar guberna Dumasında patriotlar bulmayaçaq. Ğomumän xalıq tulısınça “patriot” süzenä bitaraf, ä menä äle genä barlıqqa kilgän “Yäşellär”firqase saylawçılarnıñ 7,6%-ın cıydı. Dumada alardan 1 deputat bulaçaq. Analitiklar fikerençä, xakimiätkä qarşı yäşlär “yäşellär” yaqlı.

“Ğadel Rossiä” Samarda 15%-qa yaqın cıydı häm bu san Stavropol', Sankt- Peterburgtan soñ Rusiädä öçençe urında. “Ğädel Rossiä” Samar öçenyaña säyäsi köç häm äytergä kiräk barlığı yartı yıl ğına yäşäwenä qaramastan bu kürsätkeç zur dip äytep bula. Ä menä saylawlarda “Berdäm Rossiä” 33% belän ciñep çıqtı. Läkin dä bu sanğa bik quanırğa urın yuq, saylawçılarnıñ 67%-ı “Berdäm Rossiä” tarafdarları tügel. İke ay buyına Samar iğlan taqtaların: “Pensiälär – 1000. Eş xaqı – 25000 sum bulaçaq digän “Yedinaya Rossiä” yazmaları bizäde.

Dekaberdä saylawlar, xalıq şul aqçanı kötäçäk. 10000 sum pensiä, 25000 sum eş xaqı tormışqa aşmağan oçraqta Samarda “Berdäm Rossiä”neñ uñışı şikle. Ber mandatlı okruglarda 25 deputat arasında ber genä tatar da uza almadı. Ä menä säyäsi firqälär isemlege buyınça ike tatarnıñ uzuı ixtimal, tik bu familiälär beraz soñraq bilgele bulaçaq.

Şamil Bahautdin, Samar

XS
SM
MD
LG