Accessibility links

Кайнар хәбәр

Sverdlaw ölkäse Degtyarsk şähärendä berençe Sabantuy uzdırılaçaq


Bu könnärdä Degtyärskidan kilgän eşmäkär yeget Firdäwes Xisamov Yekaterinburg şähärendä eşläp kilüçe Milli media-xolding citäkçeläre belän oçraştı.

Degtyärsk şähäre Yekaterinburgtan 40 çaqrımnar tiräsendä, Uralnıñ baqır häm timer rudasına bay xäzinäle cirendä urnaşqan. Bu şähärgä nigezne 1763 nçe yılda Demidovlar salğan. Ul waqıtta bu cirlärdä nindi xäzinä yatqanın belmägän Demidovlar biredä İset yılğası yarında urnaşqan berençe metallurgiä zavodı öçen utın kümere, deget yasağannar. Şähärneñ iseme dä “deget” digän süzdän kilep çıqqan. Ä çın şaxtalar biredä monnan 55 yıl elek barlıqqa kilgän. Şaxtalarnıñ küp buluı biregä eş siüçän tatar häm başqort xalqın kitergän. Bügenge köndä şähärdä ğömer itüçelärne 30 protsentqa yaqını – tatarlar häm başqortlar.

Firdäwes äfände söyläwençä, üzgärtep qoru yıllarında yabılğan şaxtalarnı älegä qadär safqa bastıruçı yuq, şähär xalqı yaqın-tirädäge zur qalalarğa yörep eşli. Ölkä üzägennän yaqın urnaşqanlıqtan, üz cirennän küçep kitmiçä yörep eşlärgä mömkinçelek bar. Şuña kürä yäşlär dä küp yäşi ikän biredä. “Bezdä bik aqıllı, aktiv, uñğan, bulğan yäşlär yäşi, sport belän şöğellänälär, narkomaniä kebek afätne şähärgä kertmäs öçen bik küp eşlärne üz başlanğıçları belän alıp baralar”, - dip söyläde Firdäwes äfände.

Anıñ äytüençä, olı yäştäge millättäşlärebezneñ safı sirägäyä, böten ömet yäşlärdä. Ämma alarnı milli ruxta tärbiäläw öçen küp köç quyası bar äle. Tatar xalqınıñ küpläp yäşäwenä qaramastan, biredä milli tormış görläp bara dip äytep bulmıy. Ällä nigä ber, bigräk tä saylaw aldı waqıtında tatar konsertları kilep kitkäli. Tatarlar üzara yöreşep, dini yolalarnı totalar. Yaqında ğına dini häm milli tormış görläp barğan Rewda häm Pervoural'ski şähärläre belän çağıştırğanda, Degtyärskida moña qädär mäçet bulmawı, tatar milli çaraları uzdırılmawı, xätta sabantuylar da oyıştırılmawı cirle tatarlarnı bik borçıy ikän. Şul turıdağı kiñäş belän kildem dä inde, dide Firdäwes äfände.

Milli media-xolding citäkçeläre belän berlektä bu yılğı iyün ayında Degtyärskida berençe sabantuy uzdıru turında kileşende. Milli çaralar buyınça eşne şunnan başlarğa kiräk digän qararğa kildelär oçraşuda qatnaşuçılar. Firdäwes äfände eşmäkär genä tügel, cirle dumada deputat ta ikän. Ul Sabantuy uzdıru öçen cir qarap, tatar aktivın cıyıp söyläşergä süz birde.

Fäwiä Safiullina,Yekaterinburg

XS
SM
MD
LG