«Azatlıq» radiosın daimi tıñlawçılar xäterlider, küptän tügel Udmurtiä respublikasınıñ Votkinskiy qalasında yäşäwçe Gölfiä İsxaqovanıñ icatı xaqında söylägän idek. Gölfiä İsxaqovanıñ «Aq moñ alıp qayınnardan» dip isemlängän ikençe şiğerlär cıyıntığı näşriättä basılıp çıqtı. Şuşı könnärdä älege kitapnı uquçılarğa täqdir itü kiçäse bulıp uzdı. Kiçä Votkinskiy qalasınıñ tatarlar küpläp töplänep yäşägän Yujnıy posulığı kitapxanädä uzdı. Äytergä kiräk, şuşındıy tatar kiçäläre bu kitapxanädä yış küreneş ikän. Bu xaqta kitapxanäneñ mödire Rämziä Ägletdinova citkerde.
Kiçägä kitap uqırğa yaratuçılar, ayıruça şiğriät belän qızıqsınuçılar kilgän ide. Şulay uq tantanada Votkinskiy şähär administratsiäseneñ mädäniät bülegennän wäkillär, İjawdan milli-mädäni avtonomiä räise İrek Şäripov, tatar ictimaği üzäge citäkçese Fnün Mirzayanov, «Yañarış» gazetası xezmätkärläre, Udmurtiädä yäşäp icat itüçe şağirlär dä kilgän ide. Kitapnı täqdir itü kiçäsenä cıyılğan xalıqqa Gölfiä İsxaqova turında küpläp söyläp torası da tügel ide, ul şähärdä yaxşı tanış şäxes. Un yıldan artıq «Turğay» ansamblen citäkli, cirle radiodan tatar telendä «Säläm» isemle tapşırular möxärrire, respublikada çığıp kilüçe tatar basması «Yañarış» gazetasınıñ aktiv xäbärçese. Gölfiä xanımnıñ bu ölkädäge tırış, ayausız xezmäte respublikanıñ matbuğat häm mäğlumat ministrlığınıñ Maqtaw gramotası belän büläklände. Gölfiä İsxaqova milli xäräkättä aktiv qatnaşa. Gölfiä İsxaqova berniçä yıl elek Tatarstannıñ Älmät şähärenä küçep kitüe, küplär öçen zur yuğaltu bulğan. Süz avtornıñ yaqtaşlarına.
Bügen Gölfiä İsxaqova Votkinskiy şähäreneñ 12 sanlı mäktäbendä tatar tele däreslären dä alıp bara äle. Kiçädä bu balalar üzläreneñ möğallimäläreneñ şiğerlären uqıdı, cılar başqardı.
Gölfiä İsxaqova süzlärenä Udmurtiä häm Tatarstan kompozitorları da 20-läp cırlar icat itkän. Qızğanıç, alarnı bu kiçädä başqaruçı bulmadı. Ämma kiläçäktä ul cırlar «Turğay» ansamble repertuarında töp cırlar bulaçaq dip ışandırdılar.
Udmurtiäneñ Mojga şähärennän şiğerlär avtorı, cırlar icat itüçe İlgiz Kadıyrov qälämdäşe icatı xaqında bolay dide
Gölfiä İsxaqovanıñ şiğerläre kiçädä küp yañğıradı, cıyılğan xalıq alarnı tın da almıyça tıñladı. Kitapxanä mödire Rämziä Ägletdinova avtornıñ berençe şiğerlär cıyıntığın yaratıp uquların citkerde.
Şuşındıy kiçälär xalıq küñelendä ozaq saqlana, alarda millätebezneñ şuşındıy şäxesläre buluı ğorurlanu xise uyata, dip tögälläde süzen kitapxanä mödire Rämziä xanım.
Gölfiä İsxaqova üze dä kitabın täqdir itü tantanasına küpläp xalıq cıyıluınnan, sänğät ostaları kiçädä teläp qatnaşuınnan, anıñ matur uzuınnan qänäğät.
Xämidä Ğayfullina, Udmurtiä
