Accessibility links

Кайнар хәбәр

Mixaylovski şähärendä Tatar milli üzäge “Öy tuyı” uzdırdı


Sverdlovski ölkäse Mixaylovski şähärendä oyıştırılğan Tatar milli mädäni üzäge inde uzğan ğasırnıñ tuqsanınçı yılları başınnan birle eşläp kilä. Ämma bu köngä qädär Üzäkneñ üz binası yuq ide. Milli mädäni çaralar oyıştıru, tatar yäşläreneñ yal waqıtın faydalı itep uzdıru, milli kitapxanä buldıru, ädäbi kiçälär ütkärü kebek alğa quyğan zur maqsatlarnı tormışqa aşıru öçen bergäläşep cıyıla torğan cıynaq qına poçmaq bulsa da bik zur eş bulır ide. Küp yıllar buyı törle busağaların taptarğa turı kilde milli aktivistlarğa. Häm, nihayät, uzğan yıl küptänge xıyal tormışqa aştı - elekkege balalar baqçasınıñ ber öleşen tatar milli mädäni üzägenä birü turındağı qarar qabul itelde. Ämma binanıñ bik taşlandıq xäldä buluı quanıçnı beraz kimetep cibärde – bu poçmaqnı üz köçläre belän tözekländerü mömkin tügellege kön kebek açıq ide. Sverdlovski ölkä Zakonnar cıyılışı deputatı Al'bert Abzalov tırışlığı belän, älege binanı tözekländerü öçen 125 meñ sum aqça bülep birelde. Şulay uq şähär okrugı da daimi räweştä yärdäm itep tordı. Nihayät, tözekländerü eşläre tämamlandı.

Bu könnärdä Mixaylovski Tatar milli üzägeneñ yaña binağa küçüe uñayınnan tantanalı kiçä uzdırıldı. Kiçägä Sverdlovski ölkä Zakonnar cıyılışında eşläp kilüçe tatar deputatları Rinat Sadriev, Al'bert Abzalov, Tübän Sırğa rayon xakimiäte başlığı urınbasarı Waleri Yeremeev, Mixaylovski şähär okrugı başlığı Sergey Yakimov häm başqa zur qunaqlar kilde. Alarnı yaqın-tirädäge törle awıllardan kilgän tatar häm rus fol'klor kollektivları, balalar häm yäşlär ansambl'läre, milli aktivistlar häm başqa cämäğätçelek qarşı aldı.

Forsattan faydalanıp, xalıq deputatlar häm rayon, şähär citäkçeläre belän aralaşıp aldı. Mixaylovski tatar milli-mädäni üzägen inde menä cide yıl buyı citäkläwçe Fazilä xanım Möcipova, bik dulqınlanıp üzeneñ söyeneçen belderde: -“Bügen bezdä öy bäyräme, küptän kötelgän bäyräm! Bezne zurlap zur qunaqlar kilgännär, alar bezneñ şatlığıbıznı büleşälär. Yaqtı, cılı, räxät bezdä, görläp tora Üzägebez! Küñellär üsep kitte, räxätlänep eşlise kilä”, - dide ul.

Kiçäneñ tantanalı öleşendä Mixaylovski Tatar milli üzägen öy tuyı belän qotlap, bik küp büläklär tapşırıldı. Rayon xakimiäte citäkçeläre büläkkä televizor, şähär xakimiäte östäl-urındıq kebek kiräkle cihazlar tapşırdı. Deputat Al'bert Abzalov yomşaq känäfi, Rinat Sadriev yäşlärne tatarça cırlarğa öyrätü öçen tatarça Qaraoqe-sentr, Milli media-xolding citäkçeläre tatar kitapları büläk ittelär.

“Öy tuyı” bik küñelle ütte.

Fäwiä Safiullina, Yekaterinburg

XS
SM
MD
LG