Accessibility links

Кайнар хәбәр

Fransiädäge prezident saylawlarınıñ ikençe turına Sarkozy häm Royal çığa


Fransiäneñ yaña prezidentı bulu öçen köräşne urta-uñçı Nicolas Sarkozy häm sotsialist Segolene Royal däwam itäçäk, xörmätle tıñlawçılar. Saylawlarnıñ ikençe turı anda maynıñ 6-sında uzaçaq. Xälitkeç rolne aldağı tawış birüdä, yarışta öçençe kilgän Francois Bayrounıñ tarafdarları uynar dip kötelä, xäzer köräş şular yaqlawın qazanu öçen alıp barıla.

Saylawlarda şulay aktiv qatnaşunı Fransiä inde küptännän kürgäne yuq ide - berençe turğa tawış birü xoquqı bulğannarnıñ 84 protsentı kilde. Şuşı yuğarı kürsätkeç töp nämzätlär arasında barğan kierenke köräşne dä çağıldıra. İnde berençe turğa qädär ük töp yarışnıñ urta-uñ köçlärne wäkillek itkän Nicolas Sarkozy häm sotsialist Segolene Royal arasında baraçağı bilgele ide.

Yäkşämbe tawış birü monı yaxşı kürsätte - Sarkozy tawışlarnıñ 31, ä Royal yaqınça 26 protsentın qazandı. Berençe turda uq ciñep çığu öçen saylawçılarnıñ 50 protsenttan da artığı yaqlawı kiräk, bu oçraqta ber genä nämzät tä moña ireşä almadı, şuña da xäzer ilne ikençe tur saylawlar kötä häm fransuzlar anda ğädättägeçä uñ yä sul däğwaçı arasınnan saylarğa tieş bulaçaq.

İke nämzät tä östämä tawışlar öçen köräşne yäkşämbe kiçen ük başlap cibärde. Nicolas Sarkozy:

"Prezident saylawlarınıñ berençe turı demokratiäbez öçen zur ciñü bulıp tora. Tawış birügä şulay küpläp kilep fransuz xalqı anıñ öçen başqa beräwneñ xäl itüen telämäwen kürsätte. Häm berençe turda alğa mine çığarıp, ä madam Royalne ikençe urında qaldırıp xalıq Fransiä kiläçägen ike törle itep kürü bäxäsendä axırğaça barırğa teläwen kürsätte", di Sarkozy üz östenlegenä işarä itep.

Nicolas Sarkozy üz saylawaldı köräşen irekle bazar prinsipların yaqlap, şäxsi wä şirkät salımnarın töşerüne wäğdä itep, yaña eş urınnarı buldıru öçen kirtälärne beterü kiräklegen alğa sörep alıp bardı.

Ä menä anıñ köndäşe Royal, üzeneñ berençe xatın-qız prezident bulu kampaniäsen kiresençä, Fransiäneñ nıq tamır cäygän sotsial'' sistemasın saqlawnı, däwlätneñ iqtisad eşlärendä aktiv qatnaşuın yaqlap alıp bara. Häm ul üzeneñ sotsialistlar ğına tügel, ä bar sul xäräkätlärneñ wäkile buluına işarä itä:

"Bügen min ğadi suğışçan sotsialist qına tügel, ä bar sulçı wä ekologik xäräkätne dä bergä tuplarğa, xätta annan da yırağraq kitärgä tieş", di Segolene Royal üzen yaqlaw qırınıñ şaqtıy kiñ bula aluı xaqında.

Sarkozyne dä, Royalne dä Fransiäneñ yaña buın säyäsätçeläre dip atarğa mömkin, alar ikese dä ikençe dönya suğışınnan soñ tuğan.

Kärim Kamal
XS
SM
MD
LG