Fransiädäge Prezident saylawları näticäsenä Tatarstan xalqı da bitaraf tügel. Eçke eşlär ministrı Nikolya Sarkozi belän sotsialist Segolen Ruayal' arasındağı köräştä Nikolya Sarkozi ciñüen, törle massaküläm mäğlümat çaraları aşa qızıqsınıp küzätüçelär Qazanda da baytaq bulğan.
Fransiädäge Prezident saylawlarına mönäsäbätegez niçek? Sez kemne saylar idegez?-digän sorawğa ğadi xalıqnıñ fikere menä bolay buldı:
-Min üzem televizordan bik iğtibar belän qarap tordım. Alar dürtäw köräşkändä dä, ikäw qalğaç ta. Min üzem xatın-qız bulsın, digän idem. İl öçen, bälki, ir-at kiräkter. Xatın- qız bulsa, ildä üzgäreşlär kübräk bulır ide . Çönki başqa, Prezident xatın-qız bulğan illärdä, üzgäreşlär baytaq.
- Ruayal' millätçelekkä, xalıqçanlıqqa tartıldı , ä Sarkozi kübräk qädimçelek, konservativlıq ikänen kürsätte.
- Säyäsättä bulğan mäs’älälärne, alarnı çişü yulların äybäträk kürsätkänder.
-Min bälki xatın-qıznı saylar idem. Şulay küñelem yata. 47% cıyğan xatın-qız ul, bik tä zur kürsätkeç. Dimäk, köräş ciñel bulmağandır.
-Berkemne dä saylamas idem. Min Fransiädä bulğanım da yuq.
-Ruayal' ciñärgä tieş ide, minemçä. Ul xalıqqa tartınğan, ğailäse bar. Dürt balası bar. Anı fransuzlar döres añlamağannardır, dip kenä uylıym.
Sarkozi ciñärgä tieş tügel ide. Ul xökümät eçendä utıra, anıñ yoğıntısı da bar. Ul administrativ resurslarnı qulına aldı, axrısı. Şunıñ belän genä ciñde ul, dip uylıym. Anıñ aqçası da bar minemçä , ä Ruayälneñ podderjkası bik bulmadı, ükeneçkä qarşı.
- İr-atnı saylar idem . Çönki xatın-qıznı vlast'kä quysañ, bu bik qurqınıç närsä.
- Xatın- keşene saylar idem. Üzgäreşlär buldırasığız kilsä, xatın-qıznı saylarğa kiräk. Segolen Ruayal' berdänber xatın-qız ide Fransiä belän layıqlı idarä itä ala torğan, çönki ul Fransiäneñ aristorkratkası. Ä Sarkozi ul elekke eçke eşlär ministrı, ikençe buın emigrantlar ğailäsennän, anıñ ätiläre Pol'şadan kilgän . Ä anıñ ciñüe Fransiädäge yanğınnarnı sünderü buyınça alğan abruyı mikän inde? Min uylamıym bu säyäsi mäydanda aña yoğıntı yasağandır, dip.
- Bu dönyada xatın-qız prezidentlar bik kübäyde. Germaniädä, Finlyandiä, Şvetsiädä, Afrikalarda .
- Xatın-qız bulsa. Äybäträk bulır ide , çönki xatın-qızlar alar kübräk citeşsezlekne kürälär .
-Yulbaşçılarnıñ ir-at bulğanı da bik yaxşı. İr-at bulsa da, tärtiple keşe bulsın, dönyanı belsen, äxlaqlı bulsın.
- İr keşe ilne alğa alıp barırğa tieş . Xatıñ-qızlarnıñ yaxşı sıyfatları bar alarnıñ , ämma säyäsättä min alarğa ışanmas idem. Ğafu itegez, älbättä , alar üpkälärlär. Läkin min şulay uylıym.
Mälikä Basıyr
