Accessibility links

Amerikan häm german tışqı eşlär ministrları Mäskäwdä Rusiä belän mönäsäbätlärne qotqarırğa tırışa


Rusiä prezidentı Vladimir Putin sişämbedä ayırım-ayırım ike ministr - amerikan däwlät sekretare Condoleezza Rice häm german tışqı eşlär ministrı Frank-Walter Steinmeier belän oçraştı. Ser tügel, Mäskäwneñ Washington belän araları soñğı aylarda boz çorın kiçerä, Samarada uzaçaq Rusiä-Yewropa Berlege summitı aldınnan anıñ Yewropa belän dä mönäsäbätläre şaqtıy salqınaydı.

Mäskäwneñ Könbatış belän araların küp kenä belgeçlär xäzer citdi töstä "yaña salqın suğış" dip bäyäli. Ämma ike könlek säfär belän Mäskäwgä kilgän Condoleezza Rice üze alay isäplämi, ul Washington belän Mäskäw arasındağı qarşılıqlarnı kimetep kürsätergä tırışa, gärçä berük waqıtta, Rusiä citäkçeläreneñ soñğı aralarda xiskä birelep yasağan belderüläre üzara mönäsäbätlär öçen konstruktiv tügel, di.

Bu uñaydan Vladimir Putinneñ fivral'' ayında Münchendäge iminlek kiñäşmäsendä yasağan çığışı iskä töşä, anda ul Quşma Ştatlarnıñ dönya säyäsäten kisken tänqitläp çıqqan ide. Uzğan atnada ğına Putin yänä şul eçtälektäge çığışların däwam itep, Ciñü könendä AQŞ säyäsäten natsi Germaniäsenä tiñläde. Soñraq Mäskäw, Putin andıy çağıştıru yasamadı dip aqlansa da, bu amerikannar iğtibarınnan çittä qalmadı. Rice xisle dip näq menä şul çığışlarnı atadı da.

Anıñ Rusiä citäkçelege belän söyläşülärendä üzäktä ike möhim mäs''älä - amerikannarnıñ Üzäk Yewropada raketa qalqanı qorılmaların qoru niäte häm Berläşkän Millätlär Oyışmasında Kosovo statusın qaraw, ayırım alğanda Washingtonnıñ şuşı alban töbäge bäysezlegen yaqlawı tora. Bu ike ölkädä Rusiä belän Quşma Ştatlar älegä qapma-qarşı qaraşlarda. Putin Condoleezza Rice belän oçraşqanda Mäskäw pozitsiäsen yänä ber qabatladı, ämma berük waqıtta yaqlar, Rusiä tışqı eşlär ministrı Sergey Lavrov süzlärenä qarağanda, ike aradağı xisle belderülärne azraq yasap, konkret eşlär belän şöğellänü xaqında kileşkän. Kosovo mäs''äläsendä yaqlar urtaqlıqlar ezläw kiräk digän fikergä kilgän, ämma andıy urtaqlıqlar älegä kürenmi, di Lavrov.

Mäskäwneñ soñğı könnärdä Yewropa Berlege belän dä araları suına töşte. Ä inde şuşı atna azağında Samarada Rusiä belän Yewropa Berlege arasında çirattağı oçraşu ütärgä tieş. Elek, anda strategik xezmättäşlek turında yaña ikeyaqlı kileşü imzalanır dip kötelgän ide, ämma Pol''şa, Estoniä häm Litva moña qarşı töşte, çönki alarnıñ Rusiä belän problemaları bar. Xäzer inde Samaradağı oçraşunı saqlap qalırğa kiräk, şuşı eş belän Mäskäwgä Yewropa Berlegendä räislek itkän Germaniäneñ tışqı eşlär ministrı Frank-Walter Steinmeier kilde. Sişämbe töştän soñ Vladimir Putin anı kürep söyläşte.

Samaradağı oçraşunı qotqaru yulların Yewropa Berlege illäreneñ tışqı eşlär ministrları düşämbedä Brüsseldä dä ezläp qaradı, ämma älegä ber genä yaq ta çigenergä cıyınmawın kürsätä häm şul säbäple yaña strategik xezmättäşlek kileşüe bu yulı da qaralmayaçaq kebek.

Kärim Kamal
XS
SM
MD
LG