Accessibility links

Кайнар хәбәр

Tatar yäşläre kanikulğa Qıtayğa qaytıp kitte


Düşämbe könne Qıtaydan kilep Qazan yuğarı uqu yortlarınıñ 1нче kursın tämamlağan tatar studentları belän Bötendönya tatar kongressı Başqarma komitetında oçraşu uzdı. Rusça bötenläy belmägän, tataraçaları da çamalı bulğan Qıtaydağı yäş millättäşlärebez Qazan yuğarı yortlarınıñ 1нче kursın tämamladılar. Bilgele bulğança, yaz aylarında alarnıñ vizalarınıñ waqıtı betü säbäple Qıtayğa qaytarıp cibärmäkçelär ide. Läkin Tatarstan citäkçelege bu mäs’äläne dä xäl itte. Ğomumän, respublika här yaklap yärdäm itep kilde bu millättäşlärebezgä. Ayırım alğanda, alarnıñ uquları öçen dä Tatarstan Xökümäte tüli. Nik şul uq respublika rayonnarındağı tatar balaları alardan närsä belän kim, alarğa nik tülämilär diyuçelär dä bulır. Şuñadır Tatar kongressında uzğan oçraşu waqıtında – sez tatar millätenä xezmät itärlek belgeçlär bulırğa tieşsez dip şaqtıy wäğäz söylände. Anda kongress räise Rinat Zakirov, akademik Mirqasıym Ğosmanov, Qıtaydan kilgän tatar cämğiäte räise urınbasarı Tursuntay Ğaliev qatnaştılar.

Tatar studentları üzläreneñ sabaqları turında söylädelär. Ayıruça urıs telen üzläşterü awır buldı dip zarlandılar. Şuña da qaramastan, imtixannarnı alarnıñ kübese uñışlı ğına tapşırğan. Barı berse genä töşep qalğan. Bilgele bulğança, cäygä öylärenä qaytarıp cibärü häm vizanı ozınaytu öçen alar imtixannarnı irtäräk birdelär. Şulay da Qazan da alarğa bik oşawların belderdelär. Mäsälän Tatar däwlät ğgumanitar-pedagogiqa universitetında uquçı Fatıyma Äxmätova:

Monda bez yäşlär belän aralaştıq, Qazanda bik oşadı.

Fatıyma Äxmätovağa quşılıp Qazan däwlät universitetında uquçı İldar Ğabitov:

Rus telen öyränü awır buldı, tatar telen tiz üzläşterdek. Kiläçäktä küp tellären öyränü maqsatı tora.

Äytergä kiräk älege studentlarnıñ kübese Qazan däwlät universitetında, şulay uq Tatar däwlät gumanitar pedagogika universitetında, Qazan däwlät texnologiä universitetında, Qazan däwlät mädäniät häm sänğät universitetında häm meditsina universitetında uqıp 1нче kursların tämamladılar. Kiläse yılğa da kübese uquların da şul uqu yortlarında däwam itteräçäklären belderdelär. Qayçandır üze dä Qıtaydan kilep urnaşqan akademik Mirqasıym Ğosmanov:

Üzegezneñ maqsatlarığıznı bilgelägez. Ägär kiläçäkkä yunäleşegez bulmasa kiläse uqu yılına başqa tarmaq saylağız.

Qıtay tatar cämğiäte citäkçese urınbasarı Tursuntay Ğaliev:

Bu yäşlär Qazanda qalsa tatar xalqına kübräk xezmät itä alaçaqlar, çönki bu bezneñ ata-babalarıbız cire.

Qıtay tatar cämğiäte citäkçese Tursuntay Ğaliev kiläçäktä Qazanda uqırğa teläk belderüçe yäşlärne tağın alıp kiläçäklären äytte.

Landış Xarrasova

XS
SM
MD
LG