Accessibility links

Кайнар хәбәр

Vena mäsäläne başqa törle kürä: ätilärgä mönäsäbät


Yäş balalarnıñ pampersların almaştıru, kiräk bulsa çişenderep kienderü urınnarı Rusiädä äle McDonalds, İkea kebek çit il restorannarında ğına bar, xörmätle tıñlawçılar. Könbatış Yevropada isä mondıy uñaylıqlar – här restoranda, benzin stansiäsendä häm kibettä bulırğa tieş, häm ğadättä alar bar da. Avstriä öçen bu ğına citärlek tügel. Ber törkem irlär – mondıy "balalar poçmaqlarınıñ" xatın-qızlar bädräfe yanında buluına qarşılıq belderde. Çınnan da, keçkenä balalarnı bädräfkä xatın-qızlar yörtä, pampersların xatın-qızlar almaştıra.... Avstriä irläre monı üzgärtü kampaniäsen başladı.

Bügen Azatlıqnıñ xatın-qızlar säxifäsendä irlär turında söylibez, irlärneñ dä nindiläre turında bit! Balaların qarağan, cämäğätçelek urınnarında balalarınıñ sigän ıştannarın xatınnarına birep tügel, ä üzläre almaştırırğa telägän irlär turında!

Menä inde yartı yıl Avstriä başqalası Venada – "Venanıñ qaraşı başqa törle" digän kampaniä bara. Balalar öçen kremnar, yuınu äyberläre reklamalarında xatın-qızlar irlärgä almaştırıla. Tramvay, avtobusta kergäç tä berençe urınnar östendäge yazu – ana häm bala öçen tügel, ä ata häm bala öçen digänenä almaştırıla. Bu kampaniäne – cämäğätçelek fikerenä qolaq salğan Vena şähär şurası oyıştıra.

Bolay da Avstriädä irlär balaların bik teläp qarıy, di xatın-qızlar oyışmaları. Bügenge köndä dä ata keşelärneñ 30-40%tı öçen – qızmı ul, malaymı- balasın çişenderep kienderü, aşatu, pampersların almaştıru – ber ni tügel. Häm alarnıñ kübese – moña xatın-qız eşe dip qarawçılarğa üpkä häm protest belderä, dip yaza The Christian Science Monitor gazetı.

Eşkä yörmiçä bala qarawçı analar häm atalar alırğa tieşle xezmät xaqın ber amerikan oyışması xisaplap çığarğan. Öydä utıruçı bala qarawçı xatın-qızğa iqtisadçı, aş peşerüçe, tärbiäçe, ker yuuçı, maşinası bulsa anı yörtüçe, öy xucalığın idarä itüçe, cıyıştıruçı, baş citäkçe häm psixolog kebek distägä yaqın hönärgä iä bulırğa kiräk. Bala qarağan öçen aqça tülänsä, amerikan anaları ayına kimendä 11 meñ dollar alırlar ide, di belgeçlär.

Sez yäşägän töbäktä balalarnı kem qarıy, xörmätle tıñlawçılar? Azatlıqnıñ xatın-qızlar säxifäsendä yaña şälkem başlıybız. Ğailädä – ätilär, änilär häm balalar. Bez sezne törle illär, törle mädäniätlär täcribäse belän tanıştırırbız. Ämma tapşırularıbızda iñ küp urın – tıñlawçılarıbız, sezgä bireläçäk. Bezgä şaltratığız, yazığız!

Alsu Qormaş
XS
SM
MD
LG