Comğa könne Qazanda Bötendönya miras şähärläre oyışması kongressı tämamlandı. Berniçä kön däwam itkän älege çarada törle illärdän 40ка yaqın başqala citäkçeläre, yäki alarnıñ urınbasarları tarixi häykällärne saqlaw yunäleşendä törle utırışlar uzdırdılar, fiker alıştılar. Ämma küpçelege ber-ike könnän soñ cıyılışlardan tuyıp, Qazan belän tanışunı qulaylıraq kürep, üzlärenä irekle programma buldırdılar.
Tatarstan märkäzenä bu çaranıñ kiläçäktä faydası bulırmı ikänen äytüe äle irtäräk, ämma qayber tatar cämäğätçelege wäkilläre fikerençä, qunaqlarnıñ qayberläre Tatarstanda tatar teleneñ xäle söylägänçä maqtanırlıq tügel ikänne añlağannar. Xätta qayber cıyılışlarda törtterep tä uzğannar.
Qazan – qayber qunaqlar küñelendä üzençä istä qalır bulsa kiräk. Ayıruça Tarixi häm mädäni häykällärne saqlaw oyışmalarınıñ 6 Bötenrusiä qorıltayına kilüçelärneñ. Öçençe könne su yulı buylap “Şäläpin” korabında 200дән artıq wäkil Alabuğağa yul aldılar - 1000 yıllıq qala belän tanışırğa. Şunıñ qısalarında İzge Bolğarğa baru da qaralğan ide. Ämma bu tarixi urınğa barıp citü ber macarağa äylängän. Çönki pänceşämbe dawıl çığu näticäsendä, qunaqlar Bolğarğa barıp citä almıyça tönne “Şaläpin” korabında uzdırırğa mäcbür bulğannar. İrtän isä dulqınnar köçle bulu säbäple, kire yulğa quzğalğannar. Bilgele kilgän qunaqlarnı Bolğar kürsätmi cibärep bulmıy bit inde, häm irtän alar qaytuğa tiz arada oyıştırıp 4 avtobusta qunaqlarnı utırtıp Bolğarğa cibärgännär.
Şul ul waqıtta “Korston”da Bötendönya miras şähärläre oyışması kongressı üz eşen däwam itte. Qazandağı tatar cämäğätçelege dä çaralarnı qaldırmasqa tırıştı. Alarnıñ küpçelege tatarlar belän bäyle tarixi urınnarnı saqlap qalu nigezendä canğa yatışlı berär süz bulmasmı, İske Tatar bistäsen nindi yazmış kötä ikän dip qızıqsınıp kilgännär ide. Bu xaqta kongressnıñ tatar bülege koordinatorı Rezedä Safiullina:
Bez şul utırışta da milli miras turında süz alıp barırğa tırıştıq. Şul uq Tatar bistäse, Kreml'neñ tatar yöze, tuqay tudırğan obraz kafe-restorannarda niçek çağıla, monda bit törle yaqtan kilergä mömkin. Rezeda Safiullina belderüençä, bu çarada kilgän qunaqlarğa tatarnıñ üzençälegen kürsätü bulmağan. Rezeda Safiullina: Menä seksiälär “Korston”nıñ 5 zalında uzdı: Puşkin, Tolstoy, Dostoevskiy, Çexov, Lermontov, ä nik şunda Tuqay zalın buldırmasqa. Şulay uq tatar rizığı yuq, monnan tış Säydäşev zalında tatar fol'klorı yañğıramadı.
Bu çarağa çit cirlärdän dä küp millättäşlärebez kiläçäk dip belderelgän ide. Barı Troitski şähäre başlığı citäkçese Rawil Ğabräşitov häm Törkiädän ğalim Nadir Däwlät kenä kürendelär çaralarda.
Landış Xarrasova
