Düşämbe kiçendä tağı ber rayon başlığınıñ eşennän kitüe bilgele buldı. Bu yulı – respublikanıñ Biyektaw xakimiäte citäkçese Räşit Şäyäxmätov. Anıñ urınına Biyektawnıñ qullanuçılar cämğiäte räise Näğim Säğdiev bilgelände. Äytergä kiräk, Säğdievneñ elekkege eşlägän urını şaqtıy xikmätle bulıp çıqtı. Çönki näq menä şuşı wazifanı respublikanıñ xäzerge premyer-ministrı Röstäm Miñnexanov ta başqarğan ide. Xäzer qızıqsınuçılar Näğim Säğdievnıñ da karyera üseşe şundıy uq uñışlı bulırmı ikän, dip baş wata. Tatarstannıñ Fän häm mäğärif ministrı Räis Şäyxleslamov ta başqa eşkä küçte. Ul ministr bulıp 2004 yılnıñ avgustında bilgelängän ide. Anıñ citäkçelegendä ministrlıq şaqtıy üzgärde, yaña struktura buldırıldı, eşläwçelär sanı arttı. Ministrlıqqa eşkä kilgänçe Şäyxleslamov Qazan däwlät universitetınıñ Çallı filialın citäkläde. Anıñ urınına kilüçe dä yuğarı uqu yortı başlığı. Respublikanıñ yaña Fän häm mäğärif ministrı itep Tatarstan prezidentı qararı belän Alabuğa pedagogiä institutı rektorı Nail Wäliev bilgelände. Ul beleme buyınça rus tele häm ädäbiäte uqıtuçısı, filologiä fännäre doktorı, respublika Fännär akademiäseneñ akademigı. Şul uq waqıtta Tatarstan, döresräge Qazan yıraq Şärıqnı da kadrlar belän tä’min itüne däwam itä. Respublikadan yıraq cirlärgä eşkä kitü xäzer inde ğädätkä äylänep bara. Bu yulı çirat Qazannıñ aşığıç yärdäm xezmäteneñ başlığı Ramil Turaevqa citte. Ul Amur ölkäse başlığı itep küptän tügel genä bilgelängän Nikolay Kolesov artınnan töbäkneñ sälämätlekne saqlaw ministrı wazifasına kereşte.
Yaña bilgelänüçelär turında süz başlağanbız ikän, respublika yuğarı uqu yortlarınıñ citäkçelege almaşınular xaqında da äytep kitik. Tatarstannıñ iñ bilgele häm däräcäle yuğarı uqu yortlarınıñ berse bulğan Qazan däwlät texnik universitetı, elekke aviatsiä institutı rektorı itep şuşı uqu yortınıñ fänni eşlär buyınça prorektorı bulıp eşlägän Yuriy Gortışev saylandı. Ul 70 yäş tulu säbäple eşennän kitärgä mäcbür bulğan Gennadiy Degtyarevnı alıştırdı. Şulay uq olı yäşle bulu säbäple rektorlıqtan kitkän Qazan däwlät texnologiä universitetı citäkçese Sergey D’yakonov urınına uqu yortı başlığı itep anıñ ulı German D’yakonov saylandı.
Gölnaz İlgizär
