Accessibility links

Кайнар хәбәр

Bush häm Putin oçraşuyınnan närsä kötärgä?


Bügen, AQŞ prezidentı Gerge Bush Rusiä citäkçese Vladimir Putinnı Main ştatındağı utarında qabul itärgä tieş. Bush ike yaqlı mönäsäbätläreneñ yaxşıryına ömmetlänä, ämma belgeçlär, ike citäkçe häm il arasındağı ayırımlıqlarnıñ tiz genä yuqqa çığuına şiklänä.

Rusiä häm AQŞ ta, bu ike yaqlı oçraşudan bernindi räsmi kileşülär tözelüen kötmi. Belgeçlär dä şul fikerdä tora. Welleslew kollecendağı Rusiä iqtisadı belğeçe, professor Marshall Goldman, Azatılqqa birgän äñgämädä, ike aradağı ayırımlıqlar bik zur dip äytte. “Min oçraşuğa zur ömmetlär bağlamıy, ike ilne ayırğan mäsälälär ike köndä genä xäl itelä almıy, bu ike citäkçe ütkärgän cılı, matur, räsmi bulmağan ike il bulsa da.” Putin, AQŞnıñ dönyağa üz qarağın tağu sıltawı belän Amerikanı daimi tänqitläp kilä. Buş üz çiratında Putin citäkçelegendäge Rusiädä demokratiäneñ torışı öçen ğäyepläwlär belderä. Rusiädä, AQŞnıñ Yevropada urnaştırırğa tieşle raketa qalqanında qurqınıç kürälär. Washington, bu qalqan “zolım küçäre” illärenä, İran kebek illärgä qarata yünälderelä, dip belderep kilä. Mäskäw häm Washingtonnıñ Kosovo statusına qaraşları nıq ayırılıp tora. Kosovonıñ bäysezlekkä omtıluına Könbatış teläktäşlek kürsätä. Rusiä moña qarşı çığa. Mäskäw häm Washington şulay uq, İran atom programması mäsäläsendä dä kileşä almadı. Rusiä belgeçe professor Goldman, Bush üz gailä utarında Putinnı qabul itep, dönyağa Rusiä belän mönäsäbätlärne caylaw mömkinlegen yuğaltmawın kürsätergä teli. “The Washigton Post” gäziteneñ küzätüçese, Anne Applebaum, bu xaqta bolay di “Bush bälkem, anıñ Putin belän şäxsän mönäsäbätläre yaxşı buluın iskä alıp, ul Rusiä belän AQŞnıñ mönäsäbätlären yaxşırtı öçen alarnı torğızırğa omtıla. Min şunı ätergä telim, uylawımça bu ber qatlı qaraş.”

Main ştatınıñ okean buyndağı Kennebukport şähärendä bügen Buşnıñ Ğıraqtağı suğışı häm Rusiäneñ Çeçnäyädäge säyäsätenä qarşı protest çaraları buluı kötelä.

Bikä Timerova
XS
SM
MD
LG