Accessibility links

Кайнар хәбәр

Çekistlar suğışı - Ni öçen Çerkesov pıçraqnı dönyağa çığara?


Xakimiät öçen köräş xäzer "siloviklar", yäğni Rusiäneñ qüät xezmätläre arasında bara. Tartqalaşu inde kiñ cämäğätçelekkä dä çıqtı - "Kommersant" basmasında açıq xat basıtırp, Rusiäneñ narkotiklarğa qarşı köräş idaräse başlığı Viktor Çerkesov, çekistlar arasında barğan şuşı eçke suğış ildäge totrıqlılıqqa yanıy, anada ciñüçelär bulmayaçaq, dip kisätä. Kärim Kamal bügen, Çerkesovnıñ şuşı kisätüe belän ni öçen açıqtan-açıq belderüe säbäplärenä tuqtala.

Rusiä citäkçelegendäge çekistlar arasında barğan eçke köräş turındağı kiçäge yazmanı, nigä Viktor Çerkesov şuşı pıçraqnı kiñ cämäğätçelekkä çığarırğa bulğan soñ? digän soraw belän tämamlağan idek. Şuşı ğämäle belän ul Putin häm anıñ tirälege bilgelägän qırıs qağidälärne boza. Küzätüçe Yuliä Latınina ul qağidälärne bolay sürätli:

Yuliä Latınina, "yäşeren xezmätlärneñ altın qağidäse bar - ägär dä äyter süzeñ bar ikän, tik kenä utır. Ä inde Putinneñ eçke tirälege berär närsä bula qalsa, monı xalıqqa çığarma, monı Putingä citker" digän prinsip nigezendä eş itä", dip belderä.

Ämma Vladimir Putingä iñ yaqın keşelärdän sanalğan Viktor Çerkesov şuña da qaramastan, "Kommersant"ta açıq xat belän çığa. Kremldäge xällärne küzätep baruçılar, monıñ säbäben bolay añlata - Çerkesov çekistlarnıñ ikençe qanatı, üzeneñ köndäşläre Patruşev häm Seçin belän alıp barğan suğışta ottıra häm çarasızlıqtan ni eşlärgä belmi.

Mäskäwdäge Panorama fiker üzäge citäkçese Vladimir Pribılovski ğomumän, Viktor Çerkesovnıñ xat belän kiñ cämäğätçelekkä çığuı anıñ Putingä ütep kerä almawın kürsätä, dip isäpli.

Üktäbr başında Federal'' iminlek xezmäte Viktor Çerkesovnıñ ul citäklägän idarädäge uñ qulın - general Aleksandr Bulbovnı qulğa aldı. Aña qädär Rusiäneñ narkotiklarğa qarşı köräş idaräsendä tağın berniçä ölkän xezmätkär totqarlanğan ide. Alar qanun bozıp telefon söyläşülären yazdıruda häm şul yazmalar belän säwdä itüdä ğäyeplände.

August ayında Çerkesov häm anıñ berektäşe, prezident saqçıları başlığı Viktor Zolotovqa FSB inde ber bärep alğan ide - Patruşev keşeläre Piterburda, üterülär oyıştıruda ğäyepläp, Vladimir Barsukov digän ber eşmäkärne qulğa aldı. Qayçandır xätta "Tambovskaya Grupirovka" digän oyışqan cinayätçel törkemne citäkläwdä dä şiklänelgän şuşı keşe Çerkesovqa da, Zolotovqa da yaqın torğan dip farazlana. Xäzer inde FSB Barsukovnıñ Zolotov belän bäyläneşlären tikşerä, digän xäbärlär bar.

Şuşı ğämällär artında Patruşev häm Seçinneñ Çerkesov quätennän, anıñ Putingä yoğıntı yasawınnan qurquı häm tä''sir itü mömkinleklären kimetü tırışlığı yata, di belgeçlär. Çerkesov idaräse asılda narkotiklarğa qarşı köräş öçen genä tügel, "siloviklar"nıñ üzlären kontrol itü öçen dä qorılğan ide.

Agentura.ru säxifäse möxärrire Andrey Soldatov, FSBnıñ xäzerge citäkçeläre Çerkesovnıñ İminlek Şurasın citäkli aluınnan, xätta FSB başına kilep utıruınnan qurqa, di:

"Xäzer yäşeren xezmätlär arasında urnaşqan quät bizmäne üzgärü ixtimalı şaqtıy zur. FSBda küplär, Çerkesovnıñ yä FSBnı, yä İminlek Şurasın çitäkli alu teläge zur, ul yaña tözelgän Tikşerü komitetın da üz qaramağına alırğa tırışaçaq dip uylıy. Ä bu isä maxsus xezmätlär arasındağı bizmänne üzgärtäçäk, bozaçaq. Şuña da älege mäs''älä xäzer kompromat qullanılğan suğışta xäl itelä", dip añlata "siloviklar" arasındağı intrigalarnı Andrey Soldatov.

İnde telgä alınğan Pribılovski isä, mondıy wäzğiätkä Rusiä üzendä xakimiät büleneşe bulmaw arqasında kilde, di:

"Ni öçen mädäni dönyada xakimiät büleneşe digän närsä bar? Çönki alar şulay itep xakimiät tarmaqların kontrol itä ala. Bezdä andıy büleneş yuq, şuña da yäşeren xezmätlär ber-bersen kontrol itärgä teli, ä monıñ öçen alar ber-berse belän suğışırğa tieş", di küzätüçe Vladimir Pribılovski.

Rusiä citäkçelegendäge "siloviklar" arasında barğan suğışnıñ kiskenläşüe nigezdä menä şundıy säbäplär belän añlatıla.

Kärim Kamal
XS
SM
MD
LG